Truri i shpuar
RajoniPress
10:10, 15 Maj, 2020
Poezi nga Ganimet Klaiqi, në përkujtim të ndarjes nga jeta më 15 maj 2017
Do të takohemi një ditë
andej e këndej Bjeshkëve të Nemuna
e do të përqafohemi sa s`ka
Do t`i ngremë gotat e verës ilirike
Do t`ia rrëfejmë njëri – tjetrit të panjohurën
e do të shpalosim tërë vrazhdësinë e botës së mykur
E kur do të takohemi atë ditë
Nuk do të përflasim për vetën e trishtuar
As për mënyrën e shpimi të trurit
Kur të takohemi një ditë
do të dehemi nga enët e verës ilirike
e nuk do të ngacmohemi për trurin e shpuar
Ganimet Klaiqi lindi më 26 janar 1965, në Poliçkë të Kamenicës.
Shkollën fillore e ka mbaruar në vendlindje, të mesmen në Dardanë, fakultetin e Gjuhës dhe Letërsisë Shqipe në Prishtinë, si dhe studimet e nivelit master i ka mbaruar në Fakultetin e Filologjisë, në Universitetin e Prishtinës “Hasan Prishtina”.
Klaiqi gjatë vitit shkollor 1993/1994, ka punuar si arsimtar i Gjuhës dhe letërsisë shqipe, në shkollën fillore “Abdullah Krashnica”, në Preshevë.
Më 1997 kishte nisur punën si korrespondent në të përditshmen “Koha Ditore”.
Pas përfundimit të luftës, në institucionet e përkohshme ka punuar një vit si shef i Zyrës së Informacionit në Kamenicë. Gjatë kësaj kohe është marrë me shkrime të ndryshme, në prozë e poezi. Në vitin 2000 i është rikthyer gazetarisë ku ka vazhduar deri më 2015, ku në të njëjtën kohë filloi ligjërimin edhe në UBT, për të vazhduar këtë punë deri në ditët e fundit të jetës së tij.
Disa orë para se të vdiste, ai la një porosi për institucionet, gazetarët dhe studentët e tij:
“Të nderuar miq,profesorë, gazetarë, familjarët e mi të dashur,vëllezër e motra,që më rrini pranë në këto ditë të vështira për shërimin tim. Lajmet nga shoqnia po vinë si bombë e kurdisur, pa rrugëdalje,për shkak të mendësisë del të jetë primitive, sepse sulmet ndaj mendimit të lirë janë sulme ndaj vetë historisë njerëzore. Edhe në organizimet më të vjetra lirija e shprehjes ishte dhe mbeti boshtë i demokracise. Mos i sulmoni gazetarët për bindjen e lirë, ata mund të jenë shtyllat që i japin hov luftës kundër korrupcionit dhe krimit të organizuar! Janë tanët dhe ashtu i duam!!”./rajonipress/
