Trepça në veri, me ligje të Kosovës

Menaxhmenti i ndërmarrjes Trepça në pjesën veriore të Kosovës ka filluar procedurat për shitjen e plumbit të prodhuar në Zveçan. Ndryshe nga zakonisht, njoftimi për tender nuk është bërë në faqet zyrtare të Qeverisë së Serbisë që pretendojnë pronësi mbi këtë gjigant metalurgjik.

Kjo, në njëfarë mënyre i jep garanci kësaj ndërmarrjeje se Agjencia Kosovare e Privatizimit nuk do t’ia bllokojë kamionët me xehe në rrugë siç pati ndodhur në vitin 2011.

Në atë kohë, u patë raportuar se AKP në pamundësi për të vënë nën kontroll dhe për të shkëputur kontratën që e kishte arritur Trepça – Veri për shitjen e xeheve, kishte kërkuar nga Autoritet Doganore në Kosovë që t’i bllokojnë kamionët që eksportonin xehe të shitura nga menaxhmenti i Trepçës në Veri.

Por, tani kjo është e sigurt se nuk do të ndodhë. “Nxjerrja në shitje e prodhimeve të prodhuara në ‘Trepça-menaxhmenti në veri’, për ç’gjë është bërë shpallja nëpër media, është në përputhje me vendimin e Bordit të Drejtorëve të AKP-së të marrë në muajin maj të këtij viti, gjithnjë bazuar në ligjet në fuqi”, ka bërë të ditur zëdhënësi i AKP-së, Ylli Kaloshi … (Tribuna).