RCCOLA

Trekëndëshi poetik i paqes bashkon krijuesit shqiptarë në Karadak

/ 3 minuta lexim

Gjilan – Asociacioni alternativ i shkrimtarëve, Ars Clubi “Beqir Musliu” në Gjilan, për herë të dytë radhazi ka organizuar manifestimin rajonal të poezisë, “Trekëndëshi poetik i paqes”, si përkushtim për 12 Qershorin – Ditën e Lirisë së Kosovës.

Në trekëndëshin kufitar të Grykës së Karadakut janë bashkuar shkrimtarë nga Kosova, Kosova Lindore, Maqedonia dhe Shqipëria, ku kanë recituar poezitë e tyre, nën mesazhin “Vargjet Kalojnë”, pikërisht në kufirin që ndanë e ndalon shqiptarët.

Manifestimi, sipas Sabit Rrustemit, kryetar i Ars Clubit, synon ndërtimin e urave mes popujve, përmes poezisë, në funksion të paqes si vlerë e patjetërsueshme e njerëzimit. “Në këtë vend ku dikur kishin jehuar krismat e armëve, sot po jehojnë kushtrimet artistike”, ka thënë Rrustemi.

Kurse Nexhat Rexha nga Ars Klubi, duke e hapur manifestimin, tha se ky është trekëndësh kombëtar, që mbahet në përkujtim të lirisë së Kosovës, në 100-vjetorin e pavarësisë së shtetit shqiptar.

Uji Dea

Kurse dom Albert Jaha, famullitar i kishës katolike në Stubëll, tha se ky manifestim bashkon simbolikisht shqiptarët, të cilët jetojnë të ndarë në disa shtete, ndonëse kanë lidhje të forta shpirtërore dhe familjare. Ai u lut për bashkimin e shpirtit shqiptar në jubileun e 100-vjetorit të kombit shqiptar.

Ndërkaq, poetët Sevdail Demiri (Maqedoni), Jonuz Fetahu (Kosovë Lindore) dhe Engjëll Berisha (Kosovë), recituan poezitë e tyre, duke hapur kështu Orën letrare, e cila ka vazhduar në ambientet e kishës së Shën Anës në Dunav.

Me vargjet e tyre, poetët sfiduan kufijtë, edhe kur ata ishin të hekurt, të minuar dhe ndanin popujt. Është poezia, si gjithnjë, ajo që i mbledh dhe i afron këto shtete dhe i bën tok në një vend, duke dëshmuar se shpirti i krijuesit, është human dhe thellësisht i përkushtuar për paqe, humanizëm e dashuri mes njerëzish, ka thënë Rrustemi.

Të gjitha poezitë e këtij manifestimi, që u shoqërua dhe me kafenë e mëngjesit (restorant Dunavi), me një drekë sipas traditës së këtyre anëve (në oborrin e Kishës së Shën Anës) dhe me kafenë e pasdites (restorant Gryka e Karadakut), do të përmblidhen dhe do të botohen, ashtu si është paraparë, në një revistë që do të bartë dhe emrin e këtij Manifestimi “Trekëndëshi poetik i paqes”, që tash e tutje do jetë tradicional./rajonipress/