“Trekëndëshi…” bashkon poetët shqiptarë në Karadak

Gjilan – “Trekëndëshi…” ka vazhduar me përurimin e librit studimor “Poetika e Beqir Musliut” të autorit Yrjet Berisha. Libri është botuar këto ditë nga Shtëpia Botuese “Beqir Musliu”. Nehas Sopaj nga Universiteti i Shkupit ka folur për librin si dhe krijimtarinë letrare të Beqir Musliut, ndërsa poezi nga opusi letrar i Beqir Musliut kanë deklamuar aktori Ramadan Kurti dhe Xhezide Selimi.

Të shtunën në Gjilan është mbajtur manifestimi rajonal i poezisë “Trekëndëshi poetik i paqes”, në organizim të Ars Klubit Beqir Musliu”. Ky edicion, i gjashti me radhë, i është kushtuar shkrimtarit Beqir Musliu, në 71-vjetorin e lindjes dhe 20-vjetorin e vdekjes. Fillimisht, janë vendosur lule te varri i shkrimtarit, në varrezat e qytetit në Gjilan. Sabit Rrustemi nga Ars Clubi “Beqir Musliu” ka thënë se manifestimi i sivjetmë i kushtohet Beqir Musliut, i cili me krijimtarinë e tij aq të pasur e ka nderuar Gjilanin, Anamoravën dhe tërë Kosovën.

Pjesa tjetër e “Trekëndëshit….” është mbajtur në Grykën e Karadakut, atje ku bashkohen dhe ndahen shqiptarët e Kosovës, Maqedonisë dhe Luginës së Preshevës (Serbi). Në Grykën e Karadakut, janë tubuar poetë nga Kosova, Maqedonia, Kosova Lindore e Shqipëria, për të nderuar shkrimtarin e madh Beqir Musliu.

“Trekëndëshi…” ka vazhduar me përurimin e librit studimor “Poetika e Beqir Musliut” të autorit Yrjet Berisha. Libri është botuar këto ditë nga Shtëpia Botuese “Beqir Musliu”. Profesor dr. Nehas Sopaj nga Universiteti i Shkupit ka folur për librin si dhe krijimtarinë letrare të Beqir Musliut, ndërsa poezi nga opusi letrar i Beqir Musliut kanë deklamuar aktori Ramadan Kurti dhe Xhezide Selimi.

Në pjesën e dytë të manifestimit, është vlerësuar krijimtaria poetike e shkrimtarit të shquar nga Saranda, Agim Matos. Për poezinë e tij kanë folur profesor dr. Zejnepe Alili Rexhepi nga Universiteti i Tetovës, Nexhat Rexha, kritik e poet, Albina Idrizi, shkrimtare si dhe Timo Merkuri, poet e studiues letrar nga Saranda. Aktori i njohur nga Saranda, Vangjel Agora ka deklamuar poezi të Agim Matos.

Në pjesën e tretë dhe të fundit të këtij manifestimi tashmë tradicional, si rëndom, është mbajtur ora poetike “Koha e poezisë”, ku janë paraqitur poetë nga të gjitha trevat shqiptare.

Punimet prezantuara, organizatori, Ars Clubi “Beqir Musliu” do t`i botojë në edicionin vijues të manifestimit.

Si dhe herëve tjera, “Trekëndëshi poetik i paqes”, manifesti ky rajonal i poezisë, ka zgjuar interesimin e poetëve por edhe të dashamirëve të artit.

“Trekëndëshi…” është mbështet nga MKRS – Departamenti i Kulturës dhe Komuna e Gjilanit./rajonipress/