“Tregu në Rrota” vjen në Viti më 1 gusht, prodhuesit vendorë do të promovojnë produktet e tyre

Viti – Komuna e Vitisë po vazhdon angazhimin për mbështetjen e prodhuesve vendorë dhe promovimin e potencialit bujqësor të rajonit. Në këtë kuadër, kryetari i Komunës, Sokol Haliti, së bashku me drejtorin për Bujqësi, Pylltari dhe Zhvillim Rural, Naim Pira, kanë pritur në takim koordinatoren e projektit nga Shoqata e Përpunuesve të Frutave dhe Perimeve të Kosovës (PePeKo), Nita Ferizi Sadiku.

Gjatë takimit u dakordua që aktiviteti promovues “Tregu në Rrota” të organizohet më 1 gusht 2026, duke filluar nga ora 10:00, në sheshin e qytetit të Vitisë.

Ky aktivitet do t’u ofrojë prodhuesve lokalë mundësinë që të ekspozojnë dhe promovojnë produktet e tyre autentike, duke krijuar një urë të drejtpërdrejtë komunikimi mes fermerëve, përpunuesve dhe konsumatorëve. Organizatorët synojnë që përmes kësaj ngjarjeje të rrisin dukshmërinë e prodhimeve vendore, të nxisin konsumimin e tyre dhe të kontribuojnë në zhvillimin ekonomik lokal.

Kryetari Sokol Haliti ritheksoi përkushtimin e Komunës së Vitisë për të mbështetur iniciativa që fuqizojnë sektorin e bujqësisë dhe krijojnë mundësi të reja për prodhuesit vendorë, duke vlerësuar bashkëpunimin me Shoqatën “PePeKo” si një hap të rëndësishëm në promovimin e potencialit bujqësor të komunës.

“Tregu në Rrota” pritet të mbledhë prodhues nga Vitia dhe rrethina, duke u shndërruar në një platformë të rëndësishme për prezantimin e produkteve lokale, shkëmbimin e përvojave dhe forcimin e lidhjeve mes prodhuesve dhe qytetarëve./rajonipress/