Tregtari kosovar i drogës korrupton policin zviceran!

Ai ka marrë një dënim prej 5 vjet e gjysmë heqje lirie për tregti me drogë dhe për nxitjen e policit për të shkelur sekretin zyrtar.

Policët kishin gjetur në makinën e një pronari të firmës për ngjyrosje rreth 25 kilogramë drogë të llojit amfetaminë. Pronari i firmës dhe i drogës ishte një person 36 vjeçar me shtetësi zvicerane-kosovare , të cilin policia po e përgjonte prej disa muajsh.

Pasi ishte arrestuar, ai ishte mbajtur rreth gjashtë muaj në burgun për hetime me ç`rast kishte pranuar pjesërisht veprën gjegjësisht posedimin e drogës. Ai kishte pranuar po ashtu se kishte shitur më parë reth 14 kilogramë marihuanë. Ndërsa ai ka kundërshtar pohimin e prokurorisë se bëhet fjalë për 21 kilogramë marihuanë të shitur nga ai.

Por zbulimi më pikant gjatë hetimeve ka qenë ai se kosovari e kishte “korruptuar” një polic zviceran. Në të vërtetë ai, përmes një shoku të tij, e kishte nxitur policin të shkelte detyrimin e tij për mbajtjen e sekretit zyrtar. Në qershor të vitit 2010 polici në fjalë i kishte dhënë kosovarit informacione interne policore. Me rastin e një kërkese të dytë, për t`i dhënë adresën e një personi të dyshuar për krime, polici i ishte përgjigjur se rreth atij personi kishte shumë akte që ishin në zhvillim.

Sipas prokurorisë polici në fjalë tashmë është përjashtuar nga puna dhe do të përgjigjet para gjyqit për shkelje të sekretit zyrtar.

Kosovari i akuzuar për delikte droge dhe për nxitjen e shumëfishtë për shkelje të sekretit zyrtar është gjykuar dhe dënuar javën që shkoi nga Gjykata e Qarkut në Cyrih.

Prokurori ka kërkuar një dënim prej gjashtë vjet heqje lirie dhe një gjobë prej 110 mijë frangash, ndërsa avokati ka kërkuar dënim 20 muaj me kusht për klientin e tij.

Në fund, trupi gjykues ka shpallur verdiktin e tij, sipas të cilit personi me shtetësi të dyfishtë kosovare-zvicerane ka marrë dënimin prej 5 vjet e gjysmë heje lirie, shkruan 20min.ch.

Veç kësaj, ai do të detyrohet të paguajë 222 mijë franga nga pasuria e fituar padrejtësisht./albinfo.ch/