Tre raste në Arbitrazh ia zhvatin Kosovës mbi 100 milionë

Të enjten e kaluar opinioni publik u njoftua se Kosova i paska humbur 5 milionë euro në një Arbitrazh ndërkombëtar për çështjen e pasaportave. Por, kjo nuk është e gjitha.

Për shkak të korrupsionit dhe krimit të organizuar të pushtetarëve dhe bizneseve të lidhura me ta, Kosova i ka edhe dy raste në Arbitrazh, që do t’i kushtojnë Kosovës vlera qindra milionë euro, ose gati bankrotim të shtetit. Rasti i parë është me kompaninë gjermane “Axos” për shitjen e operatorit “Vala”.

Kjo është e lidhur me dështimin e procesit të privatizimit. Kompania gjermane ia kërkon Kosovës qindra miliona euro për faktin se, ndonëse ishte shpallur fituese, nuk i është nënshkruar kontrata e privatizimit. “AXOS” konsideron se është dëmtuar, shkruan gazeta Kosova Sot.

Spekulohet shumë se ky dështim ishte bërë me marrëveshje të firmës se diskutueshme e të përfolur për të keq dhe hajnave brenda Qeverisë së Kosovës. Dyshohet se gjermanët nuk i kanë pasur 300 milionë eurot e premtuara për ta blerë “Valën”.

Ish- ministrat e dinin këtë shumë mirë, por thuhet se është bërë plani pikërisht me pushtetarët që të tërhiqet Qeveria nga kontrata, në mënyrë që personave të inkriminuar, që kanë qëndruar prapa “AXOS”-it t’u hapet rruga për padi në Arbitrazh, e pastaj dënimin natyrisht do ta paguajnë qytetarët e Kosovës. Rasti i dytë, prapë i “Valës”, me Blerim Devollin dhe “ZMobile”. Blerim Devolli e ka paditur “Valën” për gjoja mosrespektim të një kontrate për operatorin virtual “Z-Mobile”. Për këtë mosrespektim të kontratës e ka paditur “Valën” në Arbitrazh ndërkombëtar, duke i kërkuar 40 -50 milionë euro. E, pikërisht Devollët janë të preferuarit e pushtetit me bizneset monopoliste në shumicën e sektorëve të bizneseve më fitimprurëse, dhe ky i fundit, pra Blerim Devolli ka fituar qindra miliona euro me kompaninë “Z-Mobile” për dhjetë vjet rresht, në kurriz të “Valës” ose të buxhetit të shtetit, pa investuar asgjë!.

Pandëshkueshmëria e pushtetarëve

Deri kur do të kalojnë të pandëshkuar ish-ministrat dhe ishkryeministrat që lejuan dhe po lejojnë që shteti të bjerë në dy gjunjë, pikërisht për të hapur rrugën e vjedhjeve qindra milionëshe që po bëhen bashke në mes të ministrave të dikastereve përkatëse dhe mafio-biznesmenëve të lidhur me ta, nuk dihet. Duket se këto afera kanë ngjashmëri me rastin skandaloz të CEZ-it në Shqipëri, pas së cilës kulmoi detyrimi për të miratuar Reformën në Drejtësi – detyrimisht nga SHBA-ja dhe BE-ja. Prandaj, shtrohet pyetja, e kemi një Prokurori të Shtetit që së bashku me EULEX-in e mbetur të ketë kurajën e guximin tani për të hetuar të gjitha këto dhe për t’i dërguar të korruptuarit dhe të inkriminuarit në përballje me drejtësinë? Është e habitshme pse heshtin së paku Prokuroria dhe EULEX-i, por edhe Qeveria aktuale dhe deputetët e Kuvendit, shoqëria civile, mediet mercenare e të paguara nga mafio-oligarkët financiare për këtë gjendje.

Për njohësit e ekonomisë dhe specialistët e kësaj fushe të tria këto raste të shqiptimit të gjobave nga ana e Arbitrazhit ndërkombëtar kundër kompanive nga Kosova nuk janë gjë tjetër, por vetëm një skenar i ngjashëm, sikurse atë që e inskenuan pushtetarët e Shqipërisë në rastin e CEZ-it. Me gjithë kërkesat e opozitës, ekspertëve dhe përfaqësuesve të shoqërisë civile, asnjëra nga qeveritë e Kosovës deri më sot nuk ka dhënë llogari për këto tri dështime. Ndonëse të dyja qeveritë, ajo e kaluara e Hashim Thaçit, por edhe kjo aktualja e Isa Mustafa, ka qenë dashur që ta bëjnë këtë llogaridhënie, por kjo nuk ka ndodhur deri më sot.

Gazeta u është drejtuar me pyetje Qeverisë së Kosovës, drejtuesve të disa ministrive, se a e ndjejnë ata vetën përgjegjës për këta miliona të humbura në dëm të Kosovës nga padia e kompanisë ” ZMobile” ndaj PTK-së dhe dy padive të tjera, por zyrtarët e Qeverisë së Kosovës, MF-së, MTIsë MZHE-së dhe MPB-së, nuk kanë dhënë përgjigje në këtë çështje. Veç saj, përgjigje nëse Prokuroria e Kosovës dhe ajo e EULEX-it kanë nisur hetime në dyshimet për kurdisje në marrëveshje me qëllime përfitimi nuk kanë dhënë as këto dy institucione./kosova sot/