Tre pyetje publike për Shqiprim Arifin nga opozita në Preshevë?

Më poshtë keni tekstin e plotë të thënë nga Ardita Sinani në konferencën për shtyp:

Të nderuar qytetarë të komunës së Preshevës, Në vazhdën e demaskimit të mashtrimeve, manipulimit me ndjenjat e qytetarëve dhe premtimeve të rrejshme të Shqiprim Arifit, gjatë konferencës së sotme do të flas me gjuhën e argumentit për premtimet e kryetarit të APN dhe të komunës për investimet e huaja.

Në radhën e premtimeve megalomane, që koha po e dëshmon se ishin alibi i pandershëm i Shqiprim Arifit për arritjen e qëllimeve elektorale , ai sjelljes së investimeve të huaja i dha “prioritet” mbi prioritetet.

Që nga fillimi i vitit 2016 nga Shqiprim Arifi qytetarët e komunës së Preshevës dëgjuan emra të ndryshëm investitorësh nga çdo skaj i Evropës, dëgjuan madje për industri të prodhimeve të disa produkteve dhe shërbimeve që edhe rajonit i mungonin.

Në ato momente të shpalosjes së këtyre investimeve dhe investitorëve në premtimet e Shqiprim Arifit komuna ndër më të pazhvilluarat në Serbi siç është Presheva, u shndërrua në qendër të zhvillimit dhe prosperitetit në rajon e më gjerë. Me këto premtime, ai në fakt arriti paturpësisht të entuziazmojë një shtresë e cila po mundohej të mbijetonte si rezultat i situatës shumë të vështirë socio – ekonomike.

Në serialin e premtimeve të Shqiprim Arifit për zhvillim të paparë, ne u quajtëm të paditur madje edhe të padenjë që me politikën tonë të mbrapshtë sipas tij, shkaktuam migrimin e të rinjve tanë, dhe se sipas tij, ai me “strategjinë” dhe “planin” e tij do të jetë kthesa e nevojshme për këtë rajon. E keqja e gjithë kësaj është se trendi i largimit të të rinjëve nga Presheva në drejtim të Perëndimit tash e dy vite është fatkeqësisht në rritje.

Unë dhe PVD nuk do të bëjmë sot avokatin e Serbisë duke amnistuar politikat diskriminuese të shtetit serb e duke akuzuar Shqiprim Arifin për situatën e migrimit të të rinjve. Diskursi politik i imi dhe i PVD do të mbetet i njëjtë, që për krijimin e gjendjes së pashpresë të të rinjve për perspektivë në vendin tonë, fajtor kryesor do të mbetet shteti serb.

Unë sot i shtroj pyetje publike Shqiprim Arifit: që nga koha që je në krye të komunës cila është strategjia konkrete që do të zbut papunësinë në komunën e Preshevës, normalisht duke mos llogarit ngopjen e apetiteve të një rrethi të ngushtë të interesit rreth teje dhe APN? Cila është strategjia e krijimit të vendeve të reja të punës dhe rrit zhvillimin ekonomik? Cila është metoda sipas teje për zhvillimin e bizneseve vendore? Cili është plani për avancimin e blegtorisë, bujqësisë dhe inkurajimin e femrave ndërmarrëse?

Qytetarëve të komunës së Preshevës i kujtohen shumë mirë investitorët e huaj për prodhimin e keçapit, të cilët Preshevën sipas kryetarit të APN dhe të komunës do ta shëndrronin si qendër e eksportit të këtij produktit në rajon e më gjerë. I kujtohen edhe investitorët të cilët Preshevën do ta bënin si qendër të grumbullimit të produkteve bujqësore. Qytetarëve tanë gjithashtu i kujtohen edhe investimet për ndërtimin e spitaleve rajonale, qendrave të arsimit deri edhe të investitorëve misterioz në fushën e prodhimit të energjisë solare e çka jo tjetër. Në gjithë këto investime u fol për 50, 100, 250 e madje edhe me nga 500 të punësuar.

Ndërsa loja me investitorin nga Suhareka ishte rast për të shpërfaqur sot mashtrimin klasik me qytetarët e Preshevës të Shqiprim Arifit. U akuzua PVD që ishte bërë pjesë kinse për bllokimin e këtij investitori. Ndërsa sot, të gjithë qytetarët janë të vetëdijshëm, se në këtë kompani punëtorët paguhen me të holla kesh, nuk i paguhen as kontributet dhe sigurimi, e madje përjashtohen nga puna gra shtatzëna sepse llogariten të pa afta për punë. Paradoks edhe më i madh, se ky informalitet legjitimohet nga përfaqësues të Ministrisë së Ekonomisë dhe sekretari shtetërorë apo miku më i drejtpërdrejtë i Shqiprim Arifit gjatë vizitave qe ia beri punëtorëve të kësaj kompanie.

Ne sot nuk dojme te shfaqim në këtë konferencë gëzimin për dështimet dhe për mosrealizimin e asnjë premtimi në fushën e investimeve të huaja nga ana e Shqiprim Arifit, sepse si gënjeshtër dhe metodë të pandershme për përfitim elektoral e nuhatëm që nga fillimi. Investitorët dhe investimet e tilla sot qytetarët e Preshevës mund ti shohin e dëgjojnë vetëm në spotet elektorale të Shqiprim Arifit. Rezultati i vetëm i Shqiprim Arifit sot është humbja e të vetmes shpresës qe i ka mbetur te rinjve tanë.

Jemi për të shprehur mllefin e qytetarëve që Shqiprim Arifi i llogariti të lehtë për t’u manipuluar, jemi për të shprehur zhgënjimin e një shtrese e cila e shkelur nga gjendja e rëndë socio – ekonomike i besoi një “zhvillimi” të tillë ekonomik. Jam sot në këtë konferencë për të shtruar dilemën e qytetarëve të Preshevës ndaj Shqiprim Arifit: sot që është në krye të komunës, pse nuk i zë në gojë këta investitor misterioz, se për t’i sjellur me kohë e kemi kuptuar që ka qenë një nga shume mashtrimet e manipulimet e tij!

Ardita Sinani, PVD-Preshevë

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).