Trçek: Roli i opozitës është të jetë kritik, por mos t’i kalojë kufijtë

Kryetari i Grupit të Miqësisë Kosovë – Slloveni, Elmi Reçica, ka takuar sot kryetarin e Grupit të Miqësisë Slloveni-Kosovë Franc Trçek. Me këtë rast Reçica është shprehur falënderues për shtetin slloven për krejt ato që ka bërë për Kosovën.

“Marrëdhëniet në mes dy shteteve janë intenzive, të vërteta dhe miqësore. Këtu është një grup i biznesmenëve. Sllovenia është një nga mbështetësit e fuqishëm për të na ndihmuar për anëtarësim në BE dhe liberalizim të vizave.”, tha Reçica.

Ndërsa Franc Trçek tha se me kolegët nga Kosova kanë biseduar për situatën e krijuar në Parlament dhe rolin e opozitës në këtë situatë.

“Dihet qe roli i opozitës është të jetë kritik por mos t’i kalojë kufijtë. Ndërsa sa i përket integrimit të Kosovës duhet të bëhet në mënyrën më të drejtë të mundshme. Edhe ne e kemi problem sa i përket kufirit me Kroacinë por prapë se prapë jemi anëtarë të BE-së. Kosova nuk është vet një demokraci e re por edhe një shtet qe ka shumë te rinj dhe jemi takuar me ta dhe rinia është krenaria juaj”, tha Trçek.

Në këtë takim kanë marrë pjesë edhe deputetë nga opozita./indeksonline/