Transformimi i vitit – Vetëvendosje

Fushata e madhe për nevojën e ndryshimit rrënjësor të kursit të Kosovës, nuk solli rritjen që Vetëvendosje kishte pritur. Partia e Albin Kurtit rriti numrin e deputetëve në Kuvend, por jo edhe përqindjen që donte. Mbeti gjithsesi forca e tretë politikë në vend.

Kurti një ditë pas zgjedhjeve nuk u mor me rezultatet e forcës së tij politike, por garantoi që Thaçi 3 nuk do të kishte.

VV tha se ia dha platformën partive tjera që ta lënë PDK-në në opozitë, e për këtë ata e donin edhe këtë parti në koalicion. Pas një dështimi të parë, më 10 shtator ndodhi nënshkrimi që militantët e VV-së mund të mos e kenë menduar asnjëherë, raporton Interaktiv në KTV.

Kurti u bë një me Isa Mustafën për të cilin çoi lëndë në Prokurori, me Ramush Haradinajn – për partinë e të cilit tha se qet haraç, dhe me Fatmir Limajn të cilit ia përmendi vazhdimisht hetimet për korrupsion në Ministrinë e Transportit.

Nga kundërshtimi i çfarëdo kontakti me Serbinë, VV u vetë-ofrua ta udhëhiqte dialogun me Serbinë. Natyrisht, teorikisht i dha disa kushte për të cilat ishte më shumë se e sigurt se nuk mund të plotësoheshin kurrë në këtë fazë, përcjell koha.net.

Njerëzit kryesorë të saj kaluan shumë kohë në përpjekje për të shpjeguar thyerjen e tabusë dhe lidhjen e Aleancës së panatyrshme me njerëz për të cilët ata ishin të bindur se nuk ishin hiç më të mirë se ata të PDK-së.

Kur durimi me krizën u sos, Kurti e tha publikisht atë që e mendonte gjithmonë: i ndau në dy kategori ata që i sheh si hajna. Tha se ishte në Aleancë me hajnat e kategorisë inferiore, sepse primatin e mbante PDK-ja. Në javët e fundit prania e saj në Bllok u bë irrelevante pasi që gara për koalicion me PDK-në bëhej ndërmjet AAK-së e LDK-së.

Kur Mustafa e bëri koalicionin, VV-ja nuk u befasua dhe iu kthye retorikës së akuzave të rënda për të dhe AAK-në. Si zakonisht, premton se do të bëjë opozitë të fortë në Kuvend, por 2014-s do të mbahet mend si hapja e saj më e madhe, që nëse është përshëndetur në opinionin publik është marrë me rezerva e pakënaqësi tek shumë përkrahës e votues të saj.

Shpërndaje.
© RAJONIPRESS