Trajneri i Watfordit ia tregon derën e largimit Behramit

Trajneri i skuadrës angleze, Watford, Marco Silva, pret që Valon Behrami të largohet nga klubi përpara se të mbyllet afati kalimtar i verës.

Mesfushori i Zvicrës me prejardhje shqiptare ka bërë 49 paraqitje për skuadrën angleze që prej transferimit të tij prej 2.5 milionë funteve nga Hamburgu në verën e vitit 2015.

Por, 32-vjeçarit i është thënë se nuk është pjesë e planeve të trajnerit Silva dhe është i lirë të flasë me klubet e tjera – ai ka qenë i lidhur me një mori klubesh në Itali dhe Zvicër, duke përfshirë Udinesen edhe Sionin.

Silva ka nënshkruar me mesfushorin e Derby County, Will Hughes dhe Nathaniel Chalobah të Chelsea për të rritur mundësitë e tij që nga marrja e detyrës si menaxher në muajin maj.

“Valoni po stërvitet, por ai është një lojtar që nuk do të qëndrojë me ne”, ka thënë fillimisht Silva për Sky Sports.

“Është koha për të që të gjejë zgjidhje tjetër për karrierën e tij, dhe do të shohim se ku do të luajë, por ai s’do të jetë në skuadrën tonë”, përfundoi trajneri i Watfordit. /Telegrafi/