Tragjedia në Drenas: Enkelina dhe Anjeza vdiqën të kapura dorë për dore

Të shtrira dorë për dore, humbin jetën edhe dy engjëj, nga goditja në stacionin e trenit në Drenas. Të lidhura ashtu që as vdekja të mos i ndajë. Kështu ishin Enkelina dhe Anjeza Gjinovci, të cilat humbën jetën sot nga goditja e lokomotivës së trenit në Drenas. Ato as pas goditjes nuk i kanë lëshuar dorën njëra-tjetrës.

Ngjarja ka ndodhur sot në orët e para ditës, më saktë rreth orës 10:30 ku si pasojë e shpejtësisë së madhe të lokomotivës së trenit, humbën jetën Enkelina dhe Anjeza Gjinovci, të dyja të moshës 11 vjeçare.

Enkelina ka vdekur menjëherë në vendin e ngjarjes, ndërsa gjysmë ore më pas ka ndërruar jetë, në spitalin e Drenasit, edhe vajza e axhës së saj Anjeza.

Ngjarja më së shumi ka goditur prindërit e vajzave, të cilët nuk janë në gjendje të japin ndonjë koment për fatkeqësinë e tyre.

Ndërkaq daja i Enkelinës, Arsim Mehmeti, thotë se dhimbja është e madhe por i vetmi ngushëllim që ju mbetet si familjarë është se vdekja vjen nga Zoti. Ai u bën apel organeve kompetente që sa më shpejtë të bëjnë një zgjidhje për këtë vendkalim, në mënyrë që të parandalohen tragjedi të tjera.

E në anën tjetër qytetarët e Drenasit, me theks të veçantë banorët e asaj lagjeje janë të prekur thellë e madje edhe të frustruar me ndodhinë. Kjo për shkak se siç thonë ata, kanë bërë kërkesë tek Hekurudhat e Kosovës disa herë, për ndërtimin e një vendkalimi për këtë lagje pasi që i madh e i vogël po e rrezikon jetën me të kaluar në këtë pjesë. E vetmja përgjigje që u është kthyer për këtë kërkesë është se e kanë në projekt, dhe do të realizohet.

“Mirëpo tash e sa kohë ky projekt nuk është realizuar,” thonë njëzëri banorët e lagjes përreth stacionit të trenit./express/