Tragjedi në Dobërqan të Gjilanit: 75-vjeçari humb jetën në bunar teksa po e pastronte, nisin hetimet për rrethanat e rastit

Gjilan – Një ngjarje e rëndë ka tronditur pasditen e së dielës fshatin Dobërqan të Gjilanit, ku një 75-vjeçar ka humbur jetën pasi kishte hyrë në një bunar për ta pastruar.

Lajmin e ka konfirmuar zëdhënësi i Policisë Rajonale të Gjilanit, Ismet Hashani, i cili bëri të ditur se Policia e Kosovës ka pranuar informatën rreth orës 14:23, ndërsa njësitet patrulluese kanë reaguar menjëherë duke dalë në vendin e ngjarjes.

“Sot, rreth orës 14:23, Policia në Gjilan ka pranuar një thirrje lidhur me një rast në fshatin Dobërqan. Njësitet patrulluese me urgjencë i janë përgjigjur rastit dhe nga hetimet e para është dyshuar se një person kishte rënë në një bunar derisa ishte duke e pastruar atë”, deklaroi Hashani.

Në vendin e ngjarjes kanë intervenuar edhe ekipet e Njësisë së Zjarrfikjes dhe Shpëtimit, të cilat kanë bërë zbrazjen e bunarit për të mundësuar nxjerrjen e viktimës.

“Zjarrfikësit kanë bërë zbrazjen e bunarit dhe prej aty është tërhequr trupi i pajetë i viktimës. Mjeku kujdestar ka konstatuar vdekjen e personit, i lindur në vitin 1951”, bëri të ditur zëdhënësi i policisë.

Në vendin e ngjarjes kanë dalë edhe hetuesit rajonalë dhe ekspertët e forenzikës, të cilët kanë nisur ekzaminimin e vendit të ngjarjes për të sqaruar rrethanat e kësaj tragjedie.

Me urdhër të Prokurorit të Shtetit, trupi i pajetë është dërguar në Institutin e Mjekësisë Ligjore (IML) për obduksion, ndërsa Policia e Kosovës ka bërë të ditur se hetimet po vazhdojnë për të zbardhur plotësisht shkaqet dhe rrethanat që çuan në humbjen tragjike të jetës së 75-vjeçarit./rajonipress/