Tortura për krimin që nuk e kanë bërë

Shenjat dhe goditjet me çekan, prerjet me thika dhe me copa xhami të thyera, goditjet nga shkopinjtë e gomës u kanë mbetur si njolla që u ngjallin kujtime. Dënimi ditor ‘100 goditje kokë në mur’ u rri ende në kujtesë. Të gjykuar për një krim që nuk e kishin bërë, pesë qytetarët nga Peja për një vit rresht u janë nënshtruar torturave.

Aromën e sapunëve e ndiejnë ende. Ia dinë edhe shijen. “Supi i Pejës”, “Burgu i Leskovcit” e “Burgu i Zajeçarit” e bën trajektoren e kujtimeve të tyre.

Agron Kollqaku, Gazmend Bajrami, Xhevdet Bajrami, Beqir Loxhaj dhe Vllaznim Përgjegjaj janë pesë qytetarëtv të cilët u gjykuan për rastin e vrasjes së gjashtë fëmijëve serbë në qytetin e Pejës.

16 vite pas Serbia ka pranuar se këta fëmijë ishin vrarë nga pushteti i atëhershëm, por fajin ua kishin veshur shqiptarëve. Ngjarja kishte ndodhur më 14 dhjetor të vitit 1998 në Lagjen “Zatra”, në kafenenë që atëherë quhej “Panda”.

“Gjithçka filloi në këtë kafene që kurrë në jetë as që e kam ditur që ekziston”, fillon rrëfimin më i vjetri i këtij grupi, Agron Kollqaku. Pas 16 viteve thotë se e ka të vështirë rikthimin në kujtime. /Koha Ditore.