Tiranë: Shtatore kushtuar Adem Jasharit

Një nga elementet më të rëndësishme të kremtimeve të 100-vjetorit të Pavarësisë së Shqipërisë do të jetë shtatorja e re e Adem Jasharit në Tiranë. Ajo do të vendoset në Rrugën e Durrësit, aty ku ndodhet busti i tij i amortizuar.

Shtatorja e re e Adem Jasharit do të punohet në bronz. Mjeshtri, Muntaz Dhrahmi, është angazhuar për punimin e kësaj shtatoreje nga Bashkia e Tiranës. Shtatorja e Adem Jasharit do të inaugurohet pas datës 26 nëntor. Në ceremoninë e përurimit pritet të jetë i pranishëm edhe kryeministri i Kosovës, Hashim Thaçi.

Ndryshe, ideator kryesor i shtatores së re të Adem Jasharit është kreu i Bashkisë së Tiranës, Lulzim Basha, i cili e premtoi këtë gjë në një nga takimet e tij të pak kohë më parë. Në mbledhjen e fundit të këshillit bashkiak u vendos që, për qytetarët e Shqipërisë dhe për shqiptarët nga trojet e tjera që do ta vizitojnë Tiranën, për 100-vjetor krahas shtatores së Adem Jasharit të vendoset edhe shtatorja e Ismail Qemalit dhe ajo e Ahmet Zogut.