Therje me thikë mes dy të miturve në Gjilan, një 18-vjeçar përfundon në spital

Gjilan – Një incident i rëndë ka ndodhur mbrëmjen e së enjtes në Gjilan, ku një i mitur ka mbetur i plagosur pas një therjeje me thikë, ndërsa i dyshuari është arrestuar nga Policia e Kosovës.

Zëdhënësi rajonal i Policisë së Kosovës për rajonin e Gjilanit, Ismet Hashani, ka bërë të ditur se rreth orës 20:53 policia ka pranuar informacion për një rast therjeje në rrugën “Avdulla Tahiri”.

Sipas tij, në incident janë përfshirë dy persona të mitur, ku viktima është një mashkull i lindur në vitin 2008, ndërsa i dyshuari një mashkull i lindur në vitin 2009.

“Njësitë policore kanë reaguar menjëherë pas marrjes së informacionit, kanë dalë në vendin e ngjarjes dhe kanë arrestuar të dyshuarin, ndërsa viktima është dërguar për trajtim mjekësor në Emergjencën e Spitalit Rajonal të Gjilanit”, ka deklaruar Hashani.

Sipas raportit mjekësor, gjendja shëndetësore e viktimës është stabile dhe ai po vazhdon trajtimin nën përkujdesjen e stafit mjekësor.

Për rastin janë njoftuar Prokuroria e Shtetit dhe njësitë relevante hetimore, ndërsa Policia e Kosovës po zhvillon hetime intensive për të sqaruar motivet dhe rrethanat që çuan në këtë incident të rëndë.

Autoritetet kanë bërë të ditur se veprimet procedurale po vazhdojnë në koordinim me Prokurorinë e Shtetit, me qëllim të zbardhjes së plotë të rastit./rajonipress/