Themelohet Shoqata Kulturore “Dituria” në Bujanoc

Bujanoc – Shoqata Kulturore”Dituria” me rastin e promovimit të degës së saj dhe të hapjes së zyrës së kësaj shoqate edhe në Bujanoc, për kryetar të saj është zgjedhë, Selim Zeqiri, njofton “Presheva jonë”.

Shoqata Kulturore ”Dituria” me rastin e promovimit të degës së saj dhe të hapjes së zyrës së kësaj shoqate, ka shtruar një iftar për Muajin e Begatë të Ramazanit tek hotel “Rozafa”, ndërsa kryetar i degës së Shoqatës Kulturore” në Bujanoc, është zgjedhë, Selim Zeqiri.

Në këtë iftar solemn, në prezencë të shumë të rinjve, studentësh, drejtorë të shkollave fillore dhe të mesme, udhëheqës institucionesh lokale e fetare në Luginë, drejtori i SHK “Dituria”, Nexhmedin Ademi, nga Presheva, pasi falënderoi pjesëmarrësit prezent, theksoi se me këtë iftar në mënyrë zyrtare, pas Preshevës, po fillon punën edhe dega e kësaj shoqate në Bujanoc.

Ndërkaq, prefekti i Preshevës, Ragmi Mustafa, ka theksuar se me kënaqësi ka zgjedhë për të qenë në mesin e të ftuarve. Mustafa, me këtë rast ka thënë edhe se duhet të ndjemi krenarë se jemi shqiptarë dhe se i përkasim besimit Islam. “Ruajtja e identitetit është vlerë e njerëzimit”, ka thënë Mustafa.

Të pranishmit i ka përshëndetur edhe kryetari i degës së Shoqatës Kulturore”Dituria” , në Bujanoc, Selim Zeqiri, i cili u zotua në realizimin e premtimeve për vazhdimin e misionit të nisur me shoqatën kulturore, e cila deri më tani kishte zyrën e saj vetëm në Preshevë./Metali Krasniqi/