Thaçi: Vizita ime në SHBA u bë në momentin e duhur

Presidenti i vendit, Hashim Thaçi pas vizitës në Shtetet e Bashkuara të Amerikës ka thënë se ka marrë zotime nga dy kampet politike amerikane për mbështetjen e Kosovës.

Thaçi duke folur për vizitën e tij në SHBA, theksoi se roli i SHBA-ve duhet të jetë rol udhëheqës për Ballkanin Perëndimor.

“Unë dua t`i siguroj qytetarët e Kosovës se nuk ka dilemë sa i përket angazhimit të SHBA-ve për Kosovën. Administrata e re e SHBA-ve do të vazhdojë të jetë afër Kosovës”, ka thënë Thaçi në Info Magazinë, transmeton Telegrafi.

Rreth kritikave për vizitën e tij në këto momente kur në SHBA po ndërrohet administrata, presidenti Thaçi ka thënë se çdo prezencë e çdo lideri të Kosovës në SHBA duhet të jetë lajm i mirë, e jo të zërë vend për kritika

“Vizita ime në SHBA ka qenë në momentin e duhur për të filluar kontaktet e para me presidentin e ri”, u shpreh Thaçi.

Thaçi deklaroi se Kosova madje është në avantazh në këtë drejtim, pasi që është vendi i parë që ka vendosur kontakte direkte dhe lidhjet me kabinetin e ri.

“Kosova është në një pozicion më të favorshëm se të gjitha vendet e tjera të rajonit, sa i përket raportit me SHBA-në. Kosova është vendi i parë që ka vënë kontakte me administratën e re të këtij shteti”./Telegrafi/