Thaçi: Vitia me Nexhmedin Arifin kryetar do të përfitoj shumë

Viti – Fitorja e Nexhmedin Arifit, bashkë me partnerët e koalicionit, është e sigurt sepse kryetari Arifi është njeri i mirë, lider i mirë dhe kryetar i mirë. Me të në krye Vitia do të përfitoj sepse kryetari Arifi do të jetë kryetar i gjithë qytetarëve të komunës së Vitisë, pa dallim ka thënë Hashim Thaçi.

Salla e madhe e Shtëpisë së Kulturës ‘Gursel e Bajram Sylejmani’ ishte shumë e vogël për qytetarët e shumtë të cilët kishin ardhur për ta përkrahur kryetarin e ardhshëm të komunës së Vitisë, Nexhmedin Arifi.

Vullneti i shumicës së qytetarëve të komunës së Vitisë natyrisht se është për Partinë Demokratike të Kosovës, për kryetarin Arifi. Tubimi i mbajtur sot, në kuadër të fushatës së balotazhit, është reflektim i përcaktimit të drejtë të qytetarëve të Vitisë për vizionin e Partisë Demokratike të Kosovës, për kryetarin Arifi.

Këtë tubim të madh e hapi Shefi i Shtabit Zgjedhorë të Partisë Demokratike të Kosovës, dega në Viti, Abdyl Bajrami, i cili duke i falënderuar të pranishmit për mbështetjen e madhe të tyre, theksoi se PDK, dega në Viti, është duke punuar me seriozitet dhe përkushtim, në bashkëpunim edhe me strukturat e AAK-së dhe AKR-së, dega në Viti, për të dal fitues të sigurt në zgjedhjet e 1 dhjetorit.

Ndërkaq tubimin e përshëndetën edhe Kryetari i AAK-së, dega në Viti, Visar Demiri, dhe Kryetari i AKR-së, Enver Ukshini.Këta të dy theksuan se bashkë me strukturat e partive të tyre përkrahin fuqishëm kryetarin Arifi.

Më pas fjalën e morri kryetari Arifi, i cili duke i uruar gjithë shqiptarët për Festën e Flamurit, i falënderoi të gjithë për angazhimin e tyre të madh.

Ai tha se në mandatin e tij të ardhshëm përveç që do të qeverisë mirë dhe ndershëm, në përputhje me dispozitat bazë të sistemit juridik-pozitiv në Kosovë, do të qeverisë bashkë me qytetarët e komunës së Vitisë me qëllim të sajimit të Vitisë Europiane.

Sipas tij në mandatin e ardhshëm Qeveria e Republikës së Kosovës, respektivisht Kryeministri i Kosovës, zoti Hashim Thaçi, do të investoi në komunën e Vitisë më shumë se 22 milion euro. Në fund ai u premtoi gjithë qytetarëve të Vitisë se do të jetë kryetar i të gjithëve, pa dallim, dhe se do të jetë i përgjegjshëm.

Tubimin madhështorë e bëri fjala e Kryeministrit të Republikës së Kosovës dhe Kryetarit të Partisë Demokratike të Kosovës, Hashim Thaçi.

Sipas tij fitorja e Nexhmedin Arifit, bashkë me partnerët e koalicionit, është e sigurt. Kryeministri ndër të tjera tha se kryetari Arifi është njeri i mirë, lider i mirë dhe kryetar i mirë. “Me të në krye Vitia do të përfitoj sepse kryetari Arifi do të jetë kryetar i gjithë qytetarëve të komunës së Vitisë, pa dallim”.

Në këtë takim morën pjesë edhe Zëvendëskryetari i Partisë Demokratike të Kosovës, Kadri Veseli dhe anëtari i kryesisë qendrore të Partisë Demokratike të Kosovës, njëkohësisht deputet i Kuvendit të Kosovës, Arsim Bajrami thuhet në njoftimin e degës së PDK-së në Viti./rajonipress/