Anëtari i kryesisë së LDK-së dhe deputeti i Kuvendit të Kosovës, Arben Gashi, ka fajësuar PDK-në dhe kreun e saj Hashim Thaçin, për bllokim të dy proceseve, reformës zgjedhore dhe asaj kushtetuese. Gjatë një interviste për “Tribunën”, ai ka thënë se Thaçi nuk dëshiron zgjedhje të lira dhe demokratike.
“Tmerri i Thaçit janë zgjedhjet e lira dhe demokratike. Por, ky vend ka nevojë për zgjedhje të lira dhe PDK-ja nuk është e gatshme t’ia japë vendit këtë mundësi”, ka thënë Gashi. Ai ka folur edhe për përgatitjet brenda LDK-së për zgjedhjet lokale, derisa ka thënë se PDK-ja asnjëherë nuk mund ta marrë pushtetin në kryeqytet.
“PDK dhe Prishtina nuk kanë relacione të mira mes vete për shkak se Prishtina është bastion i vlerës, demokracisë, bastion i vizionit”, ka vlerësuar Gashi. Ai ka shtuar se LDK-ja është e hapur për koalicion me të gjitha partitë përjashtuar PDK-në. Por, ka porositur partitë e interesuara për koalicion se nuk mund ta marrin postin e kryeministrit, nëse LDK del fituese në zgjedhje.(Tribuna)
