Thaçi thotë se është dakorduar me grupin paszgjedhor “6+” për krijimin e institucioneve

Kreu i PDK-së e deputeti, Hashim Thaçi, nuk e ka pasur problem që ta njohë si koalicion paszgjedhor grupin prej 6 deputetëve të pakicave joserbe në Kuvendin e Kosovës.
Ai ka treguar se ka takuar sot këtë grup, dhe se është dakorduar për t’i bashkuar forcat në formimin e qeverisë së re.

“Sot takova grupin politik paszgjedhor ‘6+’ dhe biseduam për hapat e mëtutjeshëm për ndërtimin e institucioneve të reja të dala nga zgjedhjet e 8 qershorit. Ishte konkludim i përbashkët se aktgjykimi i Gjykatës Kushtetuese është i qartë dhe se i njëjti duhet të respektohet nga të gjitha palët politike”, ka shkruar Thaçi në profilin e tij në Facebook, transmeton koha.net.

Kreu në detyrë i ekzekutivit, ka treguar gjithashtu se me “6+”-in janë dakorduar që të punojnë bashkërisht si partnerë të koalicionit aktual për tejkalimin e ngërçit politik dhe institucional.

“T’i bashkojmë forcat për konstituimin e Kuvendit dhe për formimin e qeverisë së re ku grupi politik ‘6+’ do të ketë vendin meritor. Përkushtim i imi mbetet ndërtimi i institucioneve me një bazë sa më të gjerë politike”, ka shkruar Thaçi.