UBT

Thaçi: Të pagjeturit, çështja me prioritetin më të lartë

/ 2 minuta lexim

Kryeministri Hashim Thaçi u takua sot me Komisionin Qeveritar për persona të pagjetur, si dhe me përfaqësuesit e Këshillit Koordinues të Asociacionit të Shoqatave të familjarëve të personave të pagjetur të Kosovës, të cilët i njoftoi në lidhje me dialogun e sapo filluar për normalizimin e marrëdhënieve në mes të Republikës së Kosovës dhe Republikës së Serbisë.

Thaçi njoftoi të pranishmit në takim se ka ngritur çështjen e personave të pagjetur në dy takimet që i ka pasur deri tani me kryeministrin e Republikës së Serbisë, njofton Kryeministria nëpërmjet një komunikate për media.

“Kryeministri Thaçi theksoi se me përkushtimin më të lartë personal por edhe të Qeverisë së Republikës së Kosovës, çështja e të pagjeturve do të vazhdojë të trajtohet si çështja me prioritetin më të lartë deri sa të ndriçohet edhe rasti i fundit i personave të pagjetur”, theksohet në komunikatë.

Mobi Casa

Kryeministri në takim – siç potencohet më tej në komunikatë – mori përkrahjen edhe të Komisionit Qeveritar për Persona të Pagjetur, edhe të përfaqësuesve të Këshillit Koordinues të Asociacionit të shoqatave të familjarëve të personave të pagjetur, të cilët e përkrahën dialogun për normalizimin e marrëdhënieve në mes të Republikës së Kosovës dhe Republikës së Serbisë.

Ata gjithashtu shprehën kërkesat e tyre që kjo çështje të zgjidhet sa më parë, si dhe kërkuan një përkujdesje dhe përkushtim më të lartë të Qeverisë dhe institucioneve të Republikës së Kosovës. /Zëri/