Thaçi: Shoqëria kosovare refuzoi dhunën si mjet për realizimin e qëllimeve politike
RajoniPress
17:44, 14 Prill, 2016
Presidenti i Kosovës, Hashim Thaçi ka komentuar raportin e Departamentit Amerikan të Shtetit (DASH), sa i përket gjendjet së të drejtave të njeriut në Kosovë për vitin 2015.
Thaçi në një postim në rrjetin social Facebook ka shkruar se në raport është përmendur edhe dhuna në institucione, duke thënë se Kosova po dëshmon që dhuna nuk ka vend më këtu.
Sipas tij, është i mirëseardhur reagimi i shoqërisë kosovare, që ka refuzuar dhunën si mjet për të arritur qëllimet politike.
Lexoni postimin e plotë të Thaçit në Facebook:
E lexova me vëmendje Raportin e Departamentit amerikan të Shtetit për gjendjen e të drejtave të njeriut në Kosovë për vitin 2015. Këto vlerësime janë veçanërisht të mirëseardhura kur vijnë nga miqtë.
Në Raport vërehet pengimi i punës së Kuvendit të Kosovës, nganjëherë edhe me dhunë. Është i mirëpritur fakti që kjo dhunë është tejkaluar. Edhe më i mirëseardhur është reagimi i shoqërisë kosovare, që ka refuzuar të pranojë dhunën si mjet për të realizuar qëllime politike. Kosova po dëshmon qartë se dhuna më nuk ka vend këtu.
Si president, do të angazhohem për reformim dhe fuqizim të sundimit të së drejtës, duke vazhduar dhe përshpejtuar reformat në drejtësi dhe për të luftuar korrupsionin kudo që haset në shoqërinë tonë.
Pikë e dhimbshme por para së cilës nuk guxojmë t’i mbyllim sytë është dhuna në shoqëri, në familje, e veçanërisht ajo e drejtuar kundër grupeve më të cenueshme, si komunitetet LGBTI. Duhet t’i themi jo edhe dhunës në vendet ku shihet më pak por ku ende është e pranishme. Nuk duhet të lejojmë asnjë temë të mbetet tabu, veçanërisht nëse kjo çon te dhuna dhe diskriminimi.
Raporti duhet të shërbejë si udhërrëfyes për të gjithë ata që angazhohen për promovimin dhe mbrojtjen e të drejtave dhe lirive të njeriut. Kosova ka arritur shumë. Nuk ka dyshim se ajo është në rrugë të duhur. Sikur që nuk ka dyshim që mbetet edhe shumë punë për t’u bërë. Me përkrahjen e miqve në botë, ky rrugëtim do të bëhet më i qëndrueshëm dhe më i suksesshëm. HTH
