Thaçi – Rama flasin për “raporte vëllazërore”, autostradën Durrës – Prishtinë – Nish dhe dialogun me Serbinë

Presidenti i Kosovës, Hashim Thaçi, është pritur në Tiranë edhe nga kryeminstri shqiptar, Edi Rama. Dy liderët kanë folur për bashkëpunimin dypalësh “vëllazëror”, ndërkohë që kanë prekur edhe çështjen e dialogut me Serbinë, si dhe për çështjen e autostradës Durrës – Nish – Prishtinë, e cila nga pala serbe identifikohet vetëm me emërtimin Nish –Durrës duke e injoruar Prishtinën.

Pas takimit me Presidentin e Shqipërisë, Bujar Nishani, Thaçi është pritur edhe nga kreu i Qeverisë së Shqipërisë, Edi Rama.

Sipas njoftimin të Presidencës së Kosovës, “Presidenti Thaçi ka thënë se bashkëpunimi dypalësh i Kosovës dhe Shqipërisë udhëhiqet nga qasja vëllazërore dhe interesi i përbashkët për të thelluar ndërveprimin politik, ekonomik e kulturor, si dhe për të avancuar procesin e integrimit në Bashkimin Evropian, projekt themelor ky në shërbim të paqes, stabilitetit dhe zhvillimit”.

Thaçi ka thënë se shkëmbimet tregtare mes dy shteteve kanë arritur shifrën e 200 milionë eurove.

“Bashkëpunimi dhe partneriteti strategjik i kanë dhënë një dimension shumë më konkret dialogut dhe veprimit ndërqeveritar, me synim jetësimin e politikave të përbashkëta strategjike”, ka thënë Presidenti i Kosovës.

Rama, ndërkaq, ka përmendur procesin e Berlinit nëpërmjet të cilit BE-ja ka mbështetur një numër të rëndësishëm të korridoreve qendrore të infrastrukturës që do të lidhin portet, aeroportet dhe pikat kryesore të ekonomisë në shtetet e Ballkanit Perëndimor.

“Bashkëpunimi rajonal është çelës i paqes, stabilitetit dhe zhvillimit në rajonin tonë”, ka thënë kryeministri Rama.

Thaçi më tej ka folur edhe për projektin e autostradës për të cilin Shqipëria dhe Serbia tashmë kanë nënshkruar një marrëveshje.

“Në mesin e këtyre projekteve, presidenti Thaçi tha se rëndësi të veçantë ka edhe projekti infrastrukturor Durrës – Prishtinë – Nish dhe sigurimi i përkrahjes për nisma rajonale të bashkëpunimit”, thuhet në njoftim.

Ai, po ashtu, ka potencuar se Kosova do ta vazhdojë normalizimin e raporteve me Serbinë nëpërmjet procesit të dialogut.

Presidenti Thaçi përfundoi se e rëndësishme është që i tërë rajoni është i përcaktuar për anëtarësim në Bashkimin Evropian./express/