Thaçi: Procesi i zgjedhjeve do të jetë i besueshëm

Presidenti i vendit, Hashim Thaçi ka thënë se KQZ ka bërë një punë të mirë e profesionale në procesin elektoral të zgjedhjeve, duke e bërë kështu proces komplet të besueshëm prej të gjithë qytetarëve të Kosovës.

“Sot, proceset zgjedhore në Kosovë janë procese transparente, të drejta dhe demokratike”, ka thënë Thaçi.

Ai ka lavdëruar punën e KQZ’së dhe punën e kryesueses Valdete Daka për mbarëvajtjen e procesit zgjedhor.

Nesër, qytetarët e Drenasit do të votojnë për kryetarin e tyre të ri, mirëpo Thaçi thotë se fituesit janë vetë qytetarët.

Statusi i plotë i Hashim Thaçit:

Qytetarët e Drenasit nesër votojnë për kryetarin e ri të tyre. Por, fituesit e vërtetë do të jenë vetë qytetarët. Ata do të dëshmojnë se demokracia dhe parimet e saj janë kultivuar thellë në kulturën politike të Kosovës.

Sot, proceset zgjedhore në Kosovë janë procese transparente, të drejta dhe demokratike.

Komisioni Qendror i Zgjedhjeve dhe kryesuesja Valdete Daka kanë bërë një punë profesionale, të palodhshme, që i tërë procesi elektoral, para zgjedhjeve, në ditën e zgjedhjeve, por edhe pas tyre, të jetë proces i besueshëm prej të gjithë qytetarëve të Kosovës.

I përgëzoj edhe kandidatët për fushatën e dinjitetshme dhe duke iu uruar suksese secilit prej tyre, iu kërkoj që të vazhdojnë të kontribuojnë në përmbylljen e suksesshme të këtij procesi demokratik.

Por, më së shumti i përgëzoj qytetarët e Drenasit, që kanë mundësuar një garë elektorale të drejtë dhe dinamike.

I ftoj që ta shfrytëzojnë të drejtën e tyre për të zgjedhur, sepse nesër ata do të tregojnë edhe një herë se fati i komunës është në duart e vetë atyre. HTH /GazetaExpress/