Thaçi president, rrënues për Republikën

Analistët paralajmërojnë ditë të rënda. Lideri i PDK-së, nxitës i përçarjeve në Kosovë

“Prapaskenat e tij për pazarin me postin e presidentit janë përpjekje për vazhdimin e mbajtjes peng të pushtetit nga klani i tij. Zgjedhja eventuale e tij do të shoqërohet me pakënaqësi të madhe në Kosovë, deri në ndërmarrjet e veprimeve të hapura sabotuese kundër shtetit, jo vetëm nga opozita, por edhe nga grupet e qytetarëve”, tha Isa Mulaj për “Kosova Sot”

Derisa thellimi i krizës politike në vend po merr përmasa alarmante dhe afati kushtetues për zgjedhjen e presidentit të ri po afron, në spektrin politik të vendit nuk ka konsensus, as për mbarëvajtje të punës së institucioneve, Kuvendit dhe Qeverisë, e aq më pak për zgjedhjen e kreut të ri të shtetit.

Ndonëse ka një marrëveshje të partive të koalicionit PDK -LDK, që Hashim Thaçi të zgjidhet president i Kosovës, opozita është kundër, ndërsa zëra kundër ka edhe në radhët e koalicionit.

Analistët politikë konsiderojnë se zgjedhja eventuale e zëvendëskryeministrit të tashëm, Thaçit, në krye të Presidencës, rrezikon seriozisht që ta ketë përçaje edhe më shumë skenën politike, aq më tepër kur vendi po përjeton një krizë në raportet pozitë-opozitë, ndërsa opozita kërkon me ngulm dorëheqjen e Qeverisë ‘Mustafa’, përmes protestave që vazhdojnë këtë të shtunë./kosova sot/