Thaçi: Platforma ime Kushtetuta dhe Rezoluta e Kuvendit

Gjilan – Kryeministri i vendit Hashim Thaçi gjatë inspektimeve të lumit Mirusha në Gjilan ka folur edhe për dialogun me Serbinë. Thaçi tha se platforma e tij për bisedime është Kushtetuta e Kosovës, Rezoluta e Kuvendit dhe Deklarata e Pavarësisë.

“Platforma ime për bisedime me Serbinë do të jetë Kushtetuta, Rezoluta e Kuvendit dhe Deklarata e Pavarësisë”. Kështu është shprehur Hashim Thaçi të dielën në Gjilan gjatë inspektimeve që i ka bërë njërit prej projekteve më të mëdha në Gjilan rregullimit të lumit “Mirusha”.

Thaçi i pyetur nga gazetarët se me çfarë platforme do të shkojë Kosova në bisedime me Serbinë tha se e rëndësishme është që dialogu është përkrahur edhe nga spektri i gjer politikë ku edhe kemi të miratuar rezolutën e Kuvendit .Gjithashtu dialogu po mbështetet fuqishëm edhe nga SHBA-të dhe vendet evropiane , derisa platforma ime dhe e ekipit kosovar në bisedime do të jetë gjithmonë Kushtetuta e Republikës së Kosovës, Rezoluta e Kuvendit dhe Deklarata e pavarësisë “ tha Thaçi.

Kryeministri Thaçi tha se megjithatë urgjente mbetet implementimi i marrëveshjeve të arritura deri më tani me Serbinë siç janë integrimi i kufijve, largimi i strukturave paralele, identifikimi i të gjithë të pagjeturve.

Thaçi tha se dialogu dhe bisedimet janë çështje madhore dhe tejkalojnë konceptet partiake. “Bashkë me liderët politikë të LDK e AAK-së jemi duke punuar për procesin e marrëdhënieve bilaterale me Serbinë. Sa herë që kemi qenë të bashkuar kemi dalur të suksesshëm dhe kam besim të plotë se do të kemi sukses ngase kjo tejkalon interesat e politikës ditore, tejkalon interesat e subjekteve politike, meqë bëhet fjalë për çështje madhore dhe do të veprojmë e punojmë bashkërisht” tha Thaçi./rajonipress/