Thaçi përsërit: Marrëveshje përmes dialogut

Pas takimit të përfaqësuesve të Partisë Demokratike të Kosovës me presidenten Atifete Jahjaga, Hashim Thaçi ka theksuar se ky takim ishte në vazhdën e takimeve që presidentja po zhvillon në kuadrin e zotimeve dhe përkushtimit të saj drejt formimit të institucioneve në Kosovë.

“Ishte një takim korrekt. Vlerësojmë zotimet dhe përkushtimin e presidentes Jahjaga për të mundësuar arritjen e një marrëveshje për formimin e institucioneve. Qëndrimi i PDK-së, tanimë është i njohur – respektimi i plotë i vullnetit të qytetarëve, rezultatit të zgjedhjeve, si dhe natyrisht respektimi i vendimeve të Gjykatës Kushtetuese”, ka thënë lideri i PDK-së.

“Edhe sot bëjmë thirrje për të gjithë spektrin politik që të reflektojë në mënyrë që të ofrohet zgjidhje përmes dialogut. Marrëveshja është e domosdoshme për të shkuar drejt formimit të institucioneve”, ka thënë ndër tjerash Thaçi. /Telegrafi/

Jahjaga takon PDK-në

Presidentja e Kosovës, Atifete Jahjaga, ka filluar sot takimet e radhës me përfaqësues të partive politike në Kosovë për të trajtuar tejkalimin e ngërçit politik.

Të parët që kanë shkuar të Jahjaga, janë tre përfaqësuesit e lartë të Partisë Demokratike të Kosovës, Hashim Thaçi, Kadri Veseli dhe Hajredin Kuçi. /Telegrafi/