Thaçi: Në mesin e qershorit presim rekomandimin për vizat
RajoniPress
16:33, 18 Maj, 2018
Presidenti i Kosovës, Hashim Thaçi, ka folur para mediave pas përfundimit të Samitit të Sofjes mes BE-së dhe vendeve të Ballkanit Perëndimor.
Ai pjesëmarrjen e Kosovës në këtë Samit e ka quajtur historike, pasi, sipas tij, kjo ka qenë hera e parë që Kosova merr pjesë në një samit të tillë e barabartë me të gjitha vendet e rajonit.
Thaçi ka thënë se Kosova në këtë samit është përfaqësuar dinjitetshëm.
“Ne kemi arritur të marrin hapin shpejt, të zhvillojmë demokracinë dhe të zëmë hapin me vendet tjera”, është shprehur Thaçi.
Ai duke folur për deklaratën që ka dalë nga Samiti i Sofjes, ka thënë se pika dy e kësaj deklarate është më e rëndësishmja, ku konfirmohet mbështetja e BE-së për Ballkanin Perëndimor.
Thaçi ka thënë se presin që në mesin e qershorit të marrin rekomandimin për vizat. /Telegrafi
Thaçi tregon mesazhin nga Sofja: Harrojeni perspektivën evropiane pa fqinjësi të mirë
Presidenti i Kosovës, Hashim Thaçi ka theksuar se ai në Samitin e Sofjes ka takuar liderët e të gjitha shteteve, duke përfshirë këtu edhe presidentin francez, Emanuel Macron dhe kancelarin Angela Merkel.
Thaçi këto komente i ka bërë në një konferencë për media.
Ai ka thënë se është takuar edhe me presidentin serb, Aleksandër Vuçiq, ku sipas tij, takimi është ndërmjetësuar nga përfaqësuesja e lartë e Bashkimit Evropian (BE), Federica Mogherini.
“Në këtë takim është përsëritur përkushtimi që të fillojmë përgatitjet për fazën përfundimtare të dialogut në mes Kosovës dhe Serbisë, si mënyrë që të dyja palët të arrin paqe dhe stabilitet, i cili do të kishte reflektimi për rajonin në përgjithësi”, ka theksuar Thaçi.
Ai ka thënë se deklarata e Sofjes përmban pika të rëndësishme, e sipas tij, pika e dytë është më e rëndësishmja.
“Kjo pikë thotë qartë dhe riafirmon mbështetjen pa ekuivoke për perspektivën e Ballkanit Perëndimor”, ka shtuar Thaçi.
Ai ka thënë se mesazhi kryesor që e kanë dhënë përfaqësuesit e vendeve të fuqishme të BE-së për liderët e vendeve të Ballkanit, është sipas tij, se pa fqinjësi të mirë duhet të harrohet perspektiva evropiane. /Telegrafi/
