Thaçi në KS: Kosova do ta fitojë edhe betejën për integrim në BE dhe NATO

Zëvendëskryeministri i parë dhe ministri i Punëve të Jashtme të Republikës së Kosovës, Hashim Thaçi po merr pjesë në seancën e radhës të Këshillit të Sigurimit të Organizatës së Kombeve të Bashkuara, ku po shqyrtohet raporti tremujor i Sekretarit të Përgjithshëm, Ban Ki-moon, për situatën në Kosovë.Zëvendëskryeministri Thaçi i është drejtuar Këshillit të Sigurimit me një fjalim, ku ka prezantuar progresin e vazhdueshëm që po shënohet në Republikën e Kosovës dhe sfidat me të cilat po ballafaqohet Kosova në këtë fazë.

Duke folur për zhvillimet politike në Kosovë, Thaçi ka theksuar në tre muajt e fundit ka shënuar një përparim të përgjithshëm si në rrafshin politik ashtu edhe në atë ekonomik dhe në krijimin e vendeve të reja të punës. Ai ka shtuar se në 5 muajt e parë të bashkëqeverisjes, Kosova fitoi dy investitorë të mëdhenj të huaj – një konsorcium francez me të cilin ka nënshkruar kontratën për investime prej 400 milionë euro në turizëm dimëror në qendrën e njohur të Brezovicës.

“Ky investim do të sjellë edhe 4000 vende të reja të punës duke ndihmuar integrimin ekonomik dhe zhvillimin ekonomik edhe në zona të ndryshme të Kosovës”, ka theksuar Thaçi, duke shtuar se Qeveria e Kosovës ka dyfishuar investimet në bujqësi nga 30 milionë ne 60 milionë euro si dhe ka nisur negociata me investitorë të tjerë në shumë sektorë.

Para përfaqësuesve të Këshillit të Sigurimit, zëvendëskryeministri Thaçi ka thënë se krijimi i vendeve të reja të punës është prioritet i Qeverisë. Ai po ashtu ka përmendur vazhdimin e dialogut të nivelit të lartë në mes Kosovës dhe Serbisë, ku është arritur një marrëveshje për shuarjen e strukturave ilegale të Serbisë në sistemin e drejtësisë në Kosovë dhe për integrimin e juristëve dhe gjykatësve serbë në veri në sistemin unik të drejtësisë së Republikës së Kosovës.

Duke folur për akuzat e Serbisë se Shqipëria dhe Kosova po dëshirojnë të krijojnë Shqipërinë e Madhe, zëvendëskryeministri Thaçi ka thënë se më shumë flitet për Shqipërinë e Madhe në Beograd se në Prishtinë.

“Ne kemi fituar luftën ndaj regjimit të Millosheviqit, ne po ashtu edhe fituam pavarësinë sipas planit të Ndërmjetësit të Kombeve të Bashkuara, Martti Ahtisaari, dhe ne do të arrijmë te fitojmë edhe betejën për integrimin e rajonit në NATO dhe BE”, ka shtuar ai.

Sipas tij, ata që janë kundër NATO-s dhe Unionit Evropian dëshirojnë të krijojnë mjegull dhe të rrezikojnë progresin në Ballkan, por ne nuk do të lejojmë që këta veprimtarë kundër NATO-s dhe Unionit Evropian, kudo që gjenden, të prishin suksesin e arritur në Ballkan pas pavarësimit të Kosovës.

Zëvendëskryeministri Thaçi ka informuar shtetet anëtare të Këshillit të Sigurimit për aprovimin në Kuvend të Ligjit për ndalimin e pjesëmarrjes në lufta të huaja. Sipas tij, numri i Kosovareve të identifikuar që luftojnë në Siri dhe Irak ka rënë në rreth 50 persona.

“Këtë javë në Kosovë kemi mbledhur mbi 150 mysafirë nga mbarë bota për të diskutuar se si t’i ndihmojmë të rinjve për të përdorur rrjetet sociale për të luftuar ekstremizmin dhe për të promovuar dialogun ndërfetar”, ka thënë Thaçi.

Duke folur për procesin e themelimit të Dhomave të Posaçme, Thaci ka thënë se kjo po bëhet në kuadër të sistemit të drejtësisë së Kosovës. “Ne besojmë se shumica e këtyre akuzave janë thashetheme dhe krejtësisht të pabazuara por për të pastruar luftën tonë dhe për të izoluar rastet individuale kur ka mundur të ketë veprime negative, ne do ta themelojmë këtë institucion të pavarur dhe ndërkombëtar”, ka shtuar ai. Thaçi ka theksuar se Kosova ka ende 1600 të pagjetur nga lufta e fundit, shumica e të cilëve janë shqiptarë.

“Kot tentojnë disa ta përdorin këtë instrument për të ndryshuar historinë se luftërat në Ballkan janë shkaktuar nga qeveria e kaluar e Serbisë. Askush në Ballkan por as më gjere nuk do të harrojë terrorin dhe gjenocidin e ushtruar nga Sllobodan Millosheviq dhe përkrahësit e tij. Askush në Ballkan por as në botë nuk do të harrojë se në Srebrenicë është kryer gjenocid nga ana e forcave serbe. Askush nuk do të harrojë as verdiktin e Tribunalit të Hagës kundër lidershipit të Serbisë që ka konstatuar pa asnjë fije mëdyshje se shteti serb ishte fajtori kryesor në luftën e Kosovës për spastrim etnik, në baza raciste, dhe për qëllim të krijimit të Serbisë së Madhe”, ka thënë Thaçi.

Zëvendëskryeministri Thaçi ka njoftuar përfaqësuesit e shteteve anëtare të KS-së lidhur me forcimin e pozitës së Kosovës në botë, duke përmendur njohjen e javës së fundit nga Antigua dhe Barbuda, anëtarësimin e Kosovës në Organizatën e Frankofonisë si dhe në Komitetit Olimpik Ndërkombëtar.

Thaçi është shprehur se ka ardhur koha që Bashkimi Evropian të liberalizojë regjimin e vizave me Kosovën, si shteti i fundit në Ballkan që ende ka nevojë për viza Schengen.

“Ne shumë shpejtë do të aplikojmë edhe për anëtarësi në disa organizata të rëndësishme ndërkombëtare dhe kjo dëshmon se pavarësia e Kosovës është finale dhe e pandryshueshme”, ka shtuar ai.

——————————————————————–

Thaçi në KS: Kosova dënon incidentet në Kumanovë dhe përkrah Maqedoninë stabile

Zëvendëskryeministri i Kosovës Hashim Thaçi po flet në Këshillin e Sigurimit e cila për temë ka situatën në Kosovë.

Thaçi në filli uroi 70 vjetorin e themelim të Kombeve të Bashkuar dhe përkujtoi se Kosova tashmë është njohur nga më shumë se 100 shtete që e përbëjnë këtë organizëm. Shefi i diplomacisë së Kosovës e quajti të suksesshëm administrim e KB-së në Kosovës njëri nga shtetet më të sigurta në rajon.
Zv.kryeministri Thaçi foli për gjendjen ekonomik të vendit dhe përkujtoi, siç tha ai, të arriturat ekonomike në vend .

Ai tregoi edhe për fluksin e madh të qytetarëve të Kosovës të cilët kanë kërkuar një jetë më të mirë në Perëndim. Ai tha se është i pakënaqur me sjelljen e shtetit serb, sidomos me veprimet e policëve serbë të cilët kanë marrë ryshfet për të lejuar dhe lehtësuar emigrimin e qytetarëve të Kosovës.

Thaçi lavdëroi marrëveshjen me Listën serbe dhe kthimin e këtij subjekti politik në institucionet e Kosovës.

Ai në vazhdim bëri një pasqyrë të zhvillimeve politike në vend sh shtoi se Kosova në marrëdhëniet me Serbinë dëshiron të ndjekë shembullin e Francës dhe të Gjermanisë.

Thaçi foli edhe për ngjarje në Maqedoni, incidentet nëm Kumanovë dhe tha se Qeveria e Kosovës e dënon këtë dhunë dhe njëkohësisht se ajo është për një Maqedoni stabile e të qëndrueshme multietnike. Shefi i diplomacisë së Kosovës tha se me Maqedoninë nuk ka konteste kufitare, se me të është bërë demarkacioni pa e zhvilluar asnjë gjyqi ndërkombëtar./telegrafi/