Thaçi në kërkim të mbështetjes së SHBA-së për kufijtë

Presidenti i Kosovës Hashim Thaçi ka udhëtuar për në Shtetet e Bashkuara të Amerikës, ku do të takojë John Boltonin, këshilltarin për Siguri të presidentit të SHBA-së Donald Trump, po ashtu edhe sekretarin e Departamentit të Shtetit Mike Pompeo dhe zyrtarët të tjerë të lartë amerikanë, shkruan sot gazeta “Zëri”.

Në këto takime është bërë e ditur se do të bisedohet për marrëveshjen finale me Serbinë, ndërsa analistët politikë vlerësojnë se Thaçi do të bëjë përpjekje për të marrë mbështetjen e SHBA-së për korrigjimin e kufijve me Serbinë. Sipas tyre, kjo vizitë do të jetë vendimtare për idenë e korrigjimit të kufijve me shtetin serb, pasi vlerësojnë se nëse zyrtarët amerikanë vazhdojnë ta kundërshtojnë këtë ide, atëherë Thaçi do të fillojë zmbrapsjen, në të kundërtën thonë se do të fuqizohet ideja e ndryshimit të kufijve.

Në njoftimin për medie të Presidencës thuhet se Thaçi në Washington do të takohet me zyrtarët e lartë amerikanë, duke përfshirë edhe Boltonin e Pompeon. “Në këto takime presidenti Thaçi do të bisedojë për marrëdhëniet bilaterale ndërmjet dy shteteve, për perspektivën euroatlantike të Kosovës dhe për arritjen e një marrëveshjeje gjithëpërfshirëse dhe ligjërisht obliguese ndërmjet Kosovës e Serbisë, e cila i siguron Kosovës njohje nga Serbia dhe i hap rrugë për anëtarësim në BE, NATO dhe OKB”, thuhet në njoftimin e Presidencës.