Thaçi: Mosndriçimi i fatit të Hotit dëshmi e natyrës kriminale serbe

Më 16 maj të vitit 1999 në rrethana ende të pa ndriçuara është zhdukur, Ukshin Hoti. Presidenti i Kosovës Hashim Thaçi ka thënë se mos ndriçimi i fatit të Hotiti është dëshmi e natyrës kriminale të shtetit serb.

“Që 21 vjet ende nuk dihet për fatin e profesorit, intelektualit dhe veprimtarit të shquar kombëtar Ukshin Hoti, i cili e kaloi një pjesë të jetës nëpër burgjet jugosllave dhe serbe. Profesori Hoti që në vitin 1981 përkrahu idenë dhe kërkesën për Republikën e Kosovës, duke u bazuar në të drejtën historike dhe në konceptin e zhvillimit të Kosovës si entitet politik, që nuk mund të mbetej nën administrimin e Beogradit”, Thaçi përmes një postimi në “Facebook” ka kujtuar veprimtarinë e Ukshin Hotit .

Thaçi u shpreh se në mënyrë sistematike ushtroi dhunë, burgosje, vrasje, djegie, masakrime dhe gjenocid mbi shqiptarët e Kosovës, veçanërisht në vitet 1998 dhe 1999.

“Rasti i profesor Hotit dhe i të pagjeturve tjerë janë dëshmi se për të arritur paqe të qëndrueshme duhet të mbyllen të gjitha plagët e hapura nga lufta, të ketë drejtësi për viktimat dhe dënime për përgjegjësit”, ka shkruar presidenti.

Prej asaj kohe e deri tani, veprimtari i madh i çështjes kombëtare shqiptare, magjistri, filozofi, shkrimtari, publicisti, atdhetari i përkushtuar, Ukshin Hoti edhe sot e kësaj dite konsiderohet ende i zhdukur./express/