Thaçi: Më mirë kurrë s’ka qenë, por do të vijnë ditët edhe më të mira

Ministri i Punëve të Jashtme, Hashim Thaçi, thotë se me ikjet e qytetarëve nuk mund të ndalen tërësisht, por premton se do të punojnë maksimalisht që ti reduktojnë ato sa më shumë.

Sipas tij, vendet ku po shkojnë kosovarët nuk pranojnë azilkërkues, andaj mundësia më e mirë është të jetohet në Kosovë, e jo në kampe të vende të tjera, tha Thaçi në një intervistë për RTV21.

“Do të angazhohemi që të kalohet kjo situatë. Lëvizjet e njerëzve është e vështirë të ndalen tërësisht, por do të punojmë maksimalisht që t’i reduktojmë. Ditë më të mira do të vijnë dhe më mirë nuk ka qenë kurrë”, tha ai.

I pyetur nëse kjo mund të ndikojë negativisht në proceset e Kosovës drejt BE-së, ai tha se BE-ja nuk do ta ketë asnjë argument për të akuzuar Kosovën se nuk i ka përfunduar obligimet e nevojshme.

“Nuk është faji në Kosovë, por është faji politikë që nuk po merret vendimi në Bruksel”, tha Thaçi, duke paralajmëruar se diçka pozitive do të ndodh në këtë aspekt.

“Do punojmë maksimalisht që ky vit që po hyjmë të jetë një thyerje e akullit e të fillojnë pranimet e pesë vendeve të BE-së që ende nuk e kanë njohur Kosovën”, tha Thaçi.