Thaçi: Largimi i barrikadës, rezultat i Marrëveshjes së 19 prillit

Kryeministri i Republikës së Kosovës, Hashim Thaçi mirëpret heqjen e barrikadës mbi lumin Ibër në mënyrë vullnetare nga qytetarët e komunitetit serb, që jetojnë në komunën e Mitrovicës veriore.

Në deklaratën e Kryeministrit Thaçi thuhet:

“Ky veprim i arsyeshëm dhe i pritur i qytetarëve që jetojnë atje, dëshmon qartë pjekurinë dhe gatishmërinë për të jetuar në paqe, të lirë dhe pa barrikada. Heqja e barrikadës së fundit, është edhe një dëshmi tjetër e zbatimit me sukses të Marrëveshjes së 19 prillit 2013, të arritur ndërmjet Kosovës dhe Serbisë, në kuadër të dialogut për normalizimin e marrëdhënieve ndërmjet dy shteteve të pavarura.

Barrikadat qofshin ato fizike apo mentale nuk kanë vend në Kosovën demokratike dhe janë të papranueshme për vlerat civilizuese të shoqërisë sonë.

Si kryeministër i të gjithë qytetarëve të Kosovës, unë ju përgëzoj për këtë veprim të qytetëruar që keni bërë. Për më tepër, iu siguroj se Qeveria e Republikës së Kosovës do të përkushtohet me seriozitetin më të madh për të bërë investime kapitale në pjesën veriore të vendit, do të hapim vende të reja të punës dhe do ta përmirësojmë mirëqenien qytetare.

Vetëm duke e zhvilluar Kosovën dhe duke përqafuar vlerat perëndimore, ne sigurojmë të ardhmen tonë në BE dhe në NATO” – thekson Kryeministri i Republikës së Kosovës, Hashim Thaçi. /Telegrafi/