Thaçi kërkon përkrahje për MSA’në, integrimin europian dhe anëtarësimin në organizata ndërkombëtare

Kryediplomati kosovar, Hashim Thaçi, në kuadër të vizitës zyrtare në Paris është takuar edhe me homologun e tij francez, Laurent Fabius. Zëvendëskryeministri Thaçi e ka vlerësuar lart ndihmën dhe rolin e veçantë të Francës për shtet-ndërtimin dhe mbështetjen e gjithëmbarshme të shtetit të Kosovës. Ai ka falënderuar homologun e tij francez edhe për përkrahjen dhënë anëtarësimit të Kosovës në Organizatën Ndërkombëtare të Frankofonisë, thuhet në komunikatën e Ministrisë së Punëve të Jashtme.

“Jemi përqendruar në anëtarësimin në organizata të ndryshme që të përfitojnë qytetarët Kosovës”, ka thënë Thaçi.

Ministri i Jashtëm e ka njoftuar homologun e tij francez edhe për procesin e integrimit dhe të dialogut me Serbinë në Bruksel.

“Nënshkrimi i MSA’së, që pritet të bëhet sa më parë, do të shënojë edhe një konfirmim të suksesit tonë. Tani po punojmë me përkushtim edhe më të madh në zhvillimin ekonomik. Investimet e jashtme tashmë kanë marrë hov, duke përfshirë edhe projektin për Brezovicën”, i ka thënë Thaçi, kryediplomatit francez Fabius.

Gjithashtu, zëvendëskryeministri Thaçi ka ritheksuar se përkrahja e Francës mbetet qenësore për Kosovën në sigurimin e njohjeve nga shtete të reja dhe për anëtarësim në UNESCO por edhe në organizatat sportive.