Thaçi i propozon Jahjagës 8 qershorin për mbajtjen e zgjedhjeve

Presidentja Atifete Jahjaga e ka marrë konfirmimin nga Kryeministri Hashim Thaçi për datën e zgjedhjeve. Lideri i PDK’së ka propozuar datën 8 qershor si ditë të zgjedhjeve nacionale.

“Kryeministri Thaçi e njoftoi Presidenten Jahjaga për konsultimet e vazhdueshme me subjektet politike për mundësinë e organizimit të zgjedhjeve të përgjithshme, të parakohshme në Kosovë, dhe e theksoi qëndrimin e tij që zgjedhjet të mbahen me 8 qershor, në pajtueshmëri me forcat e tjera politike”, thuhet në njoftimin e Presidencës pas takimit Thaçi Jahjaga.

Presidentja Jahjaga theksoi se do të vazhdojë të luajë rolin e saj të faktorit të unitetit politik në Kosovë, se do të respektojë Kushtetutën dhe ligjet e Kosovës, të cilat përcaktojnë mënyrën e shpalljes së zgjedhjeve, si dhe do të respektojë vendimin që do të arrihet në Kuvendin e Republikës së Kosovës nga subjektet politike të përfaqësuara në Kuvend.

Në këtë takim, sipas njoftimit, Jahjaga dhe Thaçi kanë folur edhe për krijimin e Forcave të Armatosura të Kosovës, si dhe konsolidimin demokratik të vendit.

“Presidentja Jahjaga dhe Kryeministri Thaçi theksuan se krijimi i Forcave të Armatosura të Kosovës është i domosdoshëm, dhe është një proces gjithëpërfshirës që nuk ka alternativë. Kosova duhet ta ketë forcën e vet mbrojtëse, e cila do ta kompletojë konsolidimin e shtetit të Kosovës dhe të bëhet kontribuuese e sigurisë kolektive përmes anëtarësimit të saj në NATO”.