Thaçi: Ëndrra e brezit 1981 u bë realitet

Presidenti i Kosovës në ardhje, Hashim Thaçi, me rastin e 35-vjetorit të demonstratave studentore, ka thënë se demonstrata studentore e 11 marsit 1981 ishte pikënisje e të gjitha demonstratave që u organizuan me kërkesën kryesore për ta bërë Kosovën Republikë.

“Sot u bënë 35 vjet nga demonstrata studentore e 11 marsit 1981, e cila ishte pikënisje e të gjitha demonstratave që u organizuan gjatë këtij viti, me kërkesën kryesore për ta bërë Kosovën Republikë. Kjo demonstratë ishte një shpërthim popullor për liri dhe pavarësi. Ishte një revoltë e popullit tonë e ndrydhur në shumë breza, që më në fund solli edhe përmbysjen e ideologjisë dhe regjimit shtypës të Jugosllavisë. Ëndrra e brezit 1981 u bë realitet. Kosova sot është e pavarur, e lirë dhe sovrane”, ka shkruar Thaçi në profilin e vet në “Facebook”.