Thaçi e zgjati bllokadën e Kushtetueses për një muaj

Gjykata Kushtetuese nga 16 qershori është bllokuar për shkak të mungesës së kuorumit për vendimmarrje. Megjithatë, edhe pse Kuvendi më 6 korrik e ka përfunduar zgjedhjen e pesë gjyqtarëve të rinj, presidenti Hashim Thaçi ende nuk i ka dekretuar ata duke bërë që Kushtetuesja të mbetet edhe më tej e bllokuar, shkruan sot Gazeta “Zëri”.
Nga 16 qershori i këtij viti Gjykata Kushtetuese është bllokuar për shkak të mungesës së kuorumit. Megjithatë, më 6 korrik kanë përfunduar procedurat për zgjedhjen e pesë anëtarëve të rinj të Kushtetueses nga ana e Kuvendit të Kosovës, të cilët presidenti i vendit Hashim Thaçi ende nuk i ka dekretuar për ta mundësuar kështu zhbllokimin e punës së gardianes së Kushtetutës.
Më 18 maj Kuvendi i Kosovë ka zgjedhur për anëtarë të Gjykatës Kushtetuese Radomir Laban nga komuniteti serb dhe Bajram Ljatifin nga komunitetet joshumicë. Ndërsa më 6 korrik janë zgjedhur edhe tre gjyqtarë tjerë: Safet Hoxha, Nexhmi Rexhepi dhe Remzie Istrefi-Peçi. Por pavarësisht kësaj presidenti Hashim Thaçi nuk i ka dekretuar ata duke bërë që Gjykata të mbetet jofunksionale pasi aktualisht ka vetëm katër gjyqtarë, ndërsa për të pasur kuorum për vendimmarrje nevojiten së paku shtatë anëtarë.