Thaçi e quan Kurtin kokëfortë që po i prish raportet me Amerikën

Presidenti i Kosovës, Hashim Thaçi, e ka quajtur kokëfortë kryeministrin e vendit, Albin Kurtin, të cilin e ka akuzuar për prishje të marrëdhënieve me Shtetet e Bashkuara të Amerikës, raporton Gazeta Express.

Thaçi ka shkruar se mungesa e veprimeve dhe e vendimeve të mençura e ka thelluar izolimin e Kosovës dhe i ka prishur në mënyrë të ndjeshme raportet me SHBA-në.

“Mbetja në fuqi e tarifës është pengesë serioze dhe e pamundëson bashkëpunimin strategjik dhe investimet e reja të fuqishme amerikane në Kosovë. Prandaj, nevoja që me urgjencë të merren vendimet e duhura ishte kërkesë dhe mesazh kryesor në takim me Sekretarin Pompei dhe me Këshilltarin për Siguri Nacionale, O’Brien”, thotë ai.

I pari i shtetit ka kërkuar nga spektri politik që të marrin vendimet e duhura në mënyrë që t’i japin fund izolimit.

“Edhe kërkesa ime e qartë si president për qeverinë, për spektrin politik dhe mbi të gjitha për qytetarët e Kosovës është që pa humbur kohë të merren vendimet e duhura strategjike, të cilat i japin fund izolimit, i hapin mundësi dialogut për arritjen e marrëveshjes përfundimtare dhe e forcojnë miqësinë e përhershme dhe bashkëpunimin strategjik me SHBA-në. Hezitimi eventual për vendime të shpejta, të mençura, të plota e jo të pjesshme është i panevojshëm, sepse këto vendime janë rruga e vetme për t’i arritur qëllimet tona shtetërore dhe strategjike”, ka shkruar ai./Express/