Thaçi e përsëritë idenë e korrigjimit të kufijve në takim me përfaqësuesit nga Lugina e Preshevës

Presidenti i Kosovës, Hashim Thaçi, përderisa ka pritur në takim Shoqatën e Gazetarëve dhe përfaqësuesit e shoqërisë civile të Luginës së Preshevës, ka përsëritur edhe njëherë idenë për korrigjimin e kufijve me Serbinë, me ç’rast ka thënë se shumica e qytetarëve të Luginës e përkrahin këtë ide të tij raporton “Zeri.info”.

”Unë e mbështes fuqishëm këtë vullnet të qytetarëve në Preshevë dhe Bujanovc, si president i vendit, ndihem mirë që një pjesë e qytetarëve në Bujanoc e mbështesin këtë ide në kuadër të korrigjimit të kufijve apo demarkimit të kufirit me Serbinë në kuadër të dialogut Kosovë-Serbi mundësisht kjo një marrëveshje e arritshme në një proces paqësor e njëkohësisht obligative në rrafshin ndërkombëtarë, që do të përmbyllej vetëm me njohjen reciproke Kosovë- Serbi dhe do i hapte rrugë Kosovës për njohje edhe nga 5 vendet e Bashkimit Evropian”, tha i pari i presidencës.

Ndërkohë ai po ashtu tha se në takim më përfaqësuesit e shoqërisë civile të Luginës së Preshevës biseduan edhe për zhvillime politike në vend dhe në Luginë.

”Sot ishte kënaqësie e veçante që të takoj përfaqësuesit e shoqërisë civile nga Lugina e Preshevës. Diskutuam gjerë e gjatë për zhvillimet politike në Kosovë dhe Preshevë, po ashtu edhe për zhvillimet rajonale. Biseduam edhe për mundësitë e ecjes përpara më të shpejtë dhe më të mirë”, theksoi ai duke shtuar se ishte një diskutim i frytshëm./ZERI