Thaçi: Dhuna është e papranueshme

Zëvendëskryeministri dhe ministri i Jashtëm, Hashim Thaçi, priti në një takim njoftues komandantin e ri të KFOR-it, Gjeneral-Majorin Guglielmo Luigi MIGLIETTA, i cili ka marr postin në muajin gusht 2015.

Siç bëhet e ditur nga një njoftim i MPJ-së, zëvendëskryeministri Thaçi i ka uruar mirëseardhje komandantit Miglietta dhe ka shprehur gatishmëri që të vazhdohet me fuqizimin e bashkëpunimit të shkëlqyer me KFOR-in.

“Zëvendëskryeministri Thaçi e njoftoi komandantin e KFOR-it Miglietta për të arriturat në Kosovë, me theks të veçantë për të arriturat në muajin e fundit”, thuhet në njoftim.

“Kosova ka marrëdhënie të shkëlqyera me fqinjët dhe ka nisur procesin e normalizimit të marrëdhënieve me Serbinë, që i kontribuon paqes dhe stabilitetit në rajon”, citohet të ketë thënë zëvendëskryeministri Thaçi.

Gjithashtu thuhet se dy bashkëbiseduesit kanë diskutuar edhe për mundësitë që vala e refugjatëve të prekë Kosovën, për çështjen e pjesëmarrjes së qytetarëve kosovarë në luftërat e huaja dhe për protestat e paralajmëruara në Kosovë, për të cilat zëvendëskryeministri Thaçi ka thënë se vetëm dhuna është e papranueshme.

“Komandanti i KFOR-it Miglietta është shprehur në favor të vazhdimit të bashkëpunimit të shkëlqyer që ka KFOR-i me institucionet e Kosovës dhe ka vlerësuar se gjendja në Kosovë mbetet e qetë dhe stabile”, përfundohet në njoftimin e MPJ-së. /Telegrafi/