Thaçi: BE nuk bën të vonohet me Kosovën

Zëvendëskryeministri i parë dhe Ministri dhe i Punëve të Jashtme të Kosovës, Hashim Thaçi, me anë të një postimi në llogarinë e tij në Facebook, ka shkruar për vizitën e tij në Hungari.

Ministri i Punëve të Jashtme të Kosovës, Hashim Thaçi, me anë të një postimi në llogarinë e tij në Facebook, ka shkruar për vizitën e tij në Hungari dhe ligjëratën që ka mbajtur me temën: “Sigurimi i Perspektivës Euro-Atlantike për Kosovën.”

“Isha i ftuar nga Instituti për Punë të Jashtme e Tregti dhe Universiteti Kombëtar i Shërbimeve Publike në Hungari që të mbaj një ligjëratë publike me temën ‘Sigurimi i Perspektivës Euro-Atlantike për Kosovën’, në Budapest, Hungari.

Në ekspozenë time dhe në bashkëbisedim me audiencën e përsërita se në Kosovë ka pajtueshmëri të plotë politike e shoqërore, që NATO dhe BE-ja nuk kanë alternativë për Kosovën. Tregova se Kosova vazhdon të përmbushë pjesën e vet të detyrave dhe se këtë e pret edhe nga të tjerët.

Kosova nuk kërkon të shpërblehet apo të lajkatohet, por vetëm të trajtohet njëjtë si shtetet e tjera dhe të marrë atë që meriton. BE-ja nuk bën të vonohet as me Kosovën dhe as me rajonin,” ka shkruar Thaçi në Facebook.