Tetë shkolla të Komunës së Gjilanit janë duke u renovuar

Gjilan – Tetë shkolla fillore të Komunës së Gjilanit janë duke u rinovuar me qëllim të krijimit të një hapësirë më të mirë për zhvillimin e procesit mësimor.

Për këtë projekt ka dhënë donacion ngjyrën dhe mjetet përcjellëse “GIZ”-i gjerman, derisa puna është duke u bërë nga stafi i shkollave.

Për të parë nga afër punimet në shkollën fillore “Selami Hallaqi” ka dalë drejtori i Arsimit Nazmi Musa, i cili u nda i kënaqur me punimet që po bëhen aty.

“Ky donacion ka ardhur si rezultat i bashkëpunimit të mirë me “GIZ”-in, të cilët gjithmonë kanë shprehur interesim për të ndihmuar arsimin në Komunën e Gjilanit. Jemi shumë falënderues ndaj kësaj organizate si dhe edhe ndaj prindërve të vullnetit të mirë të cilët e kanë përqafuar këtë aksion me të gjitha mundësitë e tyre. Po dëshmohet se arsimi është prioritet i qeverisjes së kryetarit Lutfi Haziri, të cilin e falënderoj shumë për përkrahjen”, është shprehur drejtori i Arsimit, Nazmi Musa.

Drejtori i shkollës fillore “Selami Hallaqi”, Florim Maloku, tha se punët po ecin sipas dinamikës së paraparë dhe se brenda javës pritet të përfundojnë dhe gjithçka do të jetë gati për fillimin e mbarë të gjysmëvjetorit të dytë.

Nazmi Musa paralajmëroi se organizata “GIZ” do të shpërndaj në të ardhmen edhe tabela moderne për klasa në të gjitha shkollat e Komunës së Gjilanit./rajonipress/