Tetë mësimdhënës gjilanas dyshohen për falsifikim të diplomave

Gjilan- Në Gjykatën Themelore në Gjilan në departamentin e përgjithshëm ka filluar një proces gjyqësor tejet interesant. Tetë arsimtar gjilanas ndodhen në bankën e të akuzuarve nën dyshimin se kanë kryer veprën penale “legalizimi i përmbajtjes së pavërtetë”. Të akuzuarit e kanë mohuar veprën derisa avokatët mbrojtës kërkuan që procedura të pezullohet ndaj tyre transmeton rajonipress.

Në Gjykatën Themelore në Gjilan ka filluar një proces gjyqësor që ka ngjallur interesim, meqë bëhet fjalë për 8 mësimdhënës të shkollave të ndryshme fillore të Komunës së Gjilanit dhe Kamenicës.

Aktakuza e ngritur nga prokurori Shqipdon Fazliu i ngarkon arsimtarët L.D., R.S., J.S., M.S.,Xh.H., N.H., A.H., dhe J.V. se kanë vënë në lajthim Universitetin e Prishtinës e më pas edhe organet kompetente komunale, gjegjësisht Drejtorin e Arsimit në Gjilan.

Të dyshuarit thuhet në aktakuzë e edhe pse e kanë ditur se e kanë kryer SHLP në Gjakovë në mënyrë të kundërligjshme e kanë shtyrë Universitetin e Prishtinës që tua lëshojë diplomat mbi përgatitjen e lartë shkollore kurse më pas dokumentin e tillë të rremë e kanë vënë në përdorim në komunën e Gjilanit dhe Kamenicës duke aplikuar dhe duke u punësuar si mësimdhënës në shkollat fillore “Thimi Mitko” në Gjilan, “Skënderbeu” në Lisockë të Kamenicës, shkolla fillore “Afërdita” në Gadish të Gjilanit, “Nazim Hikmet” në Dobërqan dhe “Rexhep Elmazi” në Gjilan.

Përfaqësuesi i aktakuzës Ismet Ukshini tha se për këtë proces gjyqësor do të thirren si dëshmitarë edhe përfaqësuesit e Drejtorisë së Arsimit në Gjilan, përfaqësuesit e SHLP- së “Bajram Curri” në Gjakovë, përfaqësuesi ligjor i UP-së dhe përfaqësuesi ligjor i MASHT.

Pasi u është lexuar aktakuza të gjithë të akuzuarit e kanë mohuar kategorikisht veprën duke thënë se ata të gjitha provimet dhe diplomën në Gjakovë i kanë kryer në mënyrë të rregullt.

Njëri nga avokatët mbrojtës Shemsedin Piraj ka kërkuar nga trupi gjykues që po e kryeson Agim Ademi që të pezullohet rasti ndaj mësuesve.

Gjykimi vazhdon me marrjen në pyetje të përfaqësuesve të Institucioneve gjegjëse ku dyshohet se të akuzuarit i kanë vënë në lajthitje./rajonipress/