Tërbimi nga kafshimi i tërbuar

​Nga Sali Bytyçi – Kjo shoqëri është e sëmurë jo pak. Prandaj, më shumë se për çdo gjë tjetër, ka nevojë për shërim. Në Kosovë ka ndodhur një luftë, pasojat e së cilës u ngjajnë pasojave që lë kafshimi i qenit të tërbuar!

Nga kafshimi i qenit të tërbuar, njeriu nuk e pëson vetëm fizikisht, por edhe shpirtërisht: prishet nga mendtë, tërbohet! Pra, plagët fizike të një kafshimi të tillë (në rastin konkret të luftës) janë të matshme, sepse ato mund të maten me të vrarët, të zhdukurit, të dhunuarat/it, të plagosurit; ndërkaq, plagët shpirtërore janë shumëfish më të mëdha, janë edhe të pamatshme!

Një kafshim i tillë, si ai që shkaktohet nga qeni i tërbuar, i ka ndodhur popullit shqiptar të Kosovës nga Serbia. Përndryshe si të kuptohet tërbimi alogjik që e ka kapluar me të madhe një pjesë të popullit tonë, si dhe prirjet negative, nga më të ndryshmet, pas të cilave vrapojnë turmat e njerëzve tanë?!

Numri i të prishurve mendsh në Kosovë, tani është shumëfish më i madh se numri i të gjithë të vrarëve, i të dhunuarve, të të plagosurve së bashku! Ndaj edhe gjykime e veprime mendjeprishura, mendjemarra e kanë përfshirë në të katër anët Kosovën!

Kjo shoqëri është e sëmurë jo pak. Prandaj, më shumë se për çdo gjë tjetër, ka nevojë për shërim.

(9 korrik 2015)