Trajneri i Southampton, Ralph Hassenhutl, e ka lartësuar sulmuesin e vet shqiptar, Armando Broja, për paraqitjen e tij mbresëlënëse në fitoren kundër West Hamit të dielën.
Southampton u rikthye te fitorja në Premierligë pas shtatë ndeshjeve pa fitore, falë suksesit 3:2 në fushën e West Ham, një sukses edhe nën shenjën e Armando Brojës, sulmuesit shqiptar që u bë protagonist duke fituar penalltinë që solli golin e epërsisë 2:1 të shenjtorëve përmes Ward-Prowse, ndërkohë që Broja ishte i magjishëm edhe në disa raste të tjera.
“Nuk jam i befasuar nga paraqitja e Brojës pasi i njoh cilësitë e tij, është shumë i fortë dhe shumë i shpejtë me topin në këmbë. Nga ndeshja në ndeshje ai po vjen gjithnjë e më shumë në rritje”, tha Hassenfutl pas ndeshjes.
Ai shtoi: “Jam i lumtur për Armandon që fitoi penalltinë pasi nëse nuk do ta kishin penguar, ai do të shënonte”.
Broja i ka shënuar katër gola dhe e ka dhënë një asist në 14 paraqitje në sezonin e tij debutues në Premierligë.
Ai ka shkëlqyer edhe në EFL Cup, duke i shënuar dy gola në po aq paraqitje për Southamptonin.
Sulmuesi i kombëtares shqiptare është i huazuar te Southamptoni nga Chelsea deri në përfundim të këtij sezoni. /Gazeta Express/
