Telekomi paguan pagat para kohe

Telekomi i Kosovës është në rrugën e duhur për krijimin e stabilitetit financiar dhe teknik, pas vështirësive të mëdha që kishte në verën që lamë pas, ku kompania ishte para kolapsit financiar dhe gjithashtu rrezikohej komplet komunikimi i vendit dhe mirëqenia e me shumë se tre mijë familjeve, thuhet në njoftim të lëshuar për media.

Gjendja ka filluar të normalizohet me caktimin e Bordit të Përkohshëm të Drejtorëve në fund të korrikut dhe me veprimet konkrete të ndërmarra nga ky bord dhe menaxhmenti i ri.

Veprimi i parë i këtij bordi ishte zhbllokimi i llogarive të bllokuara nga përmbaruesi privat, si pasojë e vendimit final të arbitrazhit në rastin Z Mobile.

Pezullimi për një kohë të pacaktuar, respektivisht deri në krijimin e kapaciteteve financiare u bë me mirëkuptim me përmbaruesin, njëjtë sikurse u bë edhe me Administratën Tatimore.

Çdo operim financiar ishte i bllokuar dhe kompania ishte në prag të kolapsit.

Bordi dhe menaxhmenti gjithashtu kanë marrë veprime konkrete në përmirësimin e kompanisë në aspektin teknik, duke iniciuar projekte konkrete me Bankën Botërore, si ajo e lidhjes së gjithë BTS (antenave) me fije optike.

Telekomi i Kosovës është në pritje edhe të përkrahjes financiare nga aksionari, qeveria e vendit për arritjen e marrëveshjeve për mirëmbajtje të rrjetit dhe ndërrim të paisjeve të vjetëruara teknike.

Për problemet teknike që janë evidente kohë pas kohe telekomi u kërkon mirëkuptim gjithë konsumatorëve.

Veprim tjetër konkret me rëndësi të veçantë është “Plani Emergjent për Rimëkëmbjen e Telekomit”, tashmë i punuar, si dhe projekti për ristrukturimin e korporatës, për cka është kërkuar të financohet nga organizata ndërkombëtare financiare.

Sa i përket shitjes, bordi dhe menaxhmenti kanë ndërmarrë veprime konkrete për rritjen e shitjes së produkteve nga Qendra e Thirrjeve, duke transferuar rreth 100 punonjës nga shitja në këtë qendër, ndërkohë që menaxhmenti ka realizuar vizita në të gjitha rajonet, me qëllim të rritjes së efikasitetit në punë.

Menaxhmenti i përkrahur nga bordi ka bërë edhe planin konkret për uljen e shpenzimeve operacionale, aty ku nuk dëmtohet operimi normal i kompanisë, ku hyn edhe kontrata për qira me Postën e Kosovës, INFRAKOS-in dhe operator të tjerë ekonomik.

Telekomi me këto veprime konkrete dhe me përkrahjen e aksionarit do të rikthehet si kompania më kredibile në vend.