Të shtëna armësh tek “Drini Market”

Gjilan – Policia e Kosovës në stacionin policor në Gjilan është njoftuar se ka gjuajtje me armë zjarri në rrugën e Kamenicës saktësisht te “Drini Market”. Njësitet policore reaguese ju kanë përgjigjur rastit dhe kanë dalë në atë lokacion dhe kanë bërë sigurimin e vendit të ngjarjes. Në vendngjarje është takuar roja e Marketit, i njëjti ka deklaruar se ka vërejtur një veturë me ngjyrë të kuqe dyshohet të jetë Golf II, e cila fillimisht ishte ndalur afër parkingut të marketit dhe nga ajo veturë kishin dalë dy persona të cilët me tu afruar afër hyrjes së marketit kanë filluar të gjuajnë me armë në drejtim të objektit për disa herë radhazi dhe janë larguar në drejtim të panjohur.

Përveç dëmeve materiale nuk ka pas të lënduar. Në vendin e ngjarjes kanë dalë njësiti i Krimteknikes të stacionit dhe kanë bërë procesimin e vendit të ngjarjes, ku kanë gjetur dhe konfiskuar pesë (5) gëzhoja dhe katër (4) predha të kalibrit 7.65 mm.

Gjithashtu është intervistuar edhe njëri nga pronarët e marketit.

Lidhur me rastin është njoftuar Prokurori i shtetit dhe ka urdhëruar që të iniciohet rasti, “Shkaktim i rrezikut të përgjithshëm”. Rasti i referohet njësitit përkatës për procedim të mëtutjeshëm njoftoj Ismet Hashani./rajonipress/