Të rritet transparenca në shpenzimin e parasë publike!

Menaxhimi i parasë publike në Kosovë nuk është duke u bërë në mënyrën më të mirë dhe për të ndryshuar këtë praktikë duhet kohë e gjatë. Kështu ka thënë Robert Gielisse, kryesues i njësisë së Drejtoratit të Përgjithshëm për Buxhet në Komisionin Evropian gjatë një interviste për Tribunën, të premten.

Gielisse e ka pranuar se në disa fusha të kontrollit të brendshëm ka përparime megjithëse ende ekziston një vakum i madh në mes të ligjeve dhe zbatimit të tyre. Kjo gjendje, sipas tij, nuk mund të ndryshohet brenda një periudhe një apo dyvjeçare. Gielisse ka thënë se Komisioni Evropian ka qenë i brengosur për këtë gjë, prandaj ka jetësuar një projekt prej 10 milionë eurove, në mënyrë që ta ndihmojmë zbatimin dhe bërjen e reformave në këtë fushë.

Ai ka shfaqur besimin se administrata në Kosovë do t’i marrë këto reforma më seriozisht. Fundja, ka thënë se kontrolli i brendshëm i financave publike është qëllimi i fundit për të gjitha ato vende kandidate që dëshirojnë t’i bashkohen Bashkimit Evropian.(Tribuna)