Të pasigurt për Veselin

Dje ka nisur regjistrimi i përfaqësuesve të rinj të popullit në legjislaturën e gjashtë, proces ky i cili do të zgjasë tri ditë. Qysh ditën e parë deputetët “e rinj” të “Vetëvendosjes” dhe të koalicionit LAA kanë thënë se nuk do ta votojnë kryetarin e Parlamentit nëse ai do të jetë Kadri Veseli. E nga koalicioni PAN vazhdon përsëritja: “I kemi numrat!”, shkruan sot Gazeta “Zëri”.

Në ditën e parë të regjistrimit të deputetëve të legjislaturës së gjashtë për koalicionin PAN është verifikuar edhe një tjetër problem.

Para se të shkohet te formimi i Qeverisë, më 3 gusht, koalicioni fitues i dalë nga zgjedhjet e 11 qershorit do të sfidohet edhe në konstituimin e Kuvendit nëse i nominuari i tyre do të jetë Kadri Veseli.

“Heshtazi” përfaqësuesit e këtij koalicioni e kanë lënë të kuptohet se lideri i PDK-së do të jetë dhe i takon nominimi për kryeparlamentar megjithëse zyrtarisht ende nuk e kanë konfirmuar një gjë të tillë.

Por këtë fakt nuk e kanë mirëpritur deputetët e lëvizjes “Vetëvendosje” dhe të koalicionit LAA, shkruan tutuje “Zëri”.

Ata kanë thënë prerazi se nuk do ta votojnë Kadri Veselin për kryeparlamentar. Sipas tyre, PAN-i duhet ta gjejë një kandidat tjetër në mënyrë që të hapet rruga drejt bërjes së Qeverisë nga po këto dy blloqe, LVV-ja e LAA-ja.

Se do të kenë vështirësi për ta zgjedhur Veselin kryeparlamentar vlerësojnë edhe analistët politikë.

Sipas tyre, dëshmi që nuk i kanë votat është edhe zvarritja e seancës deri më tash.